Кун Кенешысь депутатъёс ветеранъёсын пумиськизы

Туннэ ветеранъёс Удмуртиысь Кун Кенеше вуылизы. Ужрадэз соос понна дасяз элькун парламентлэн депутатэз Владимир Паршин.
Люкаськемъёс азьын вераськиз Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилёва. Со вераз элькунысь законъёс сярысь, кудъёсыз пересьёслы юрттэт сётонэн герӟаськемын.
Светлана Кривилёва пусйиз, Удмуртиын Быдӟым Атыкай ожлэн ветеранъёсыз 780 кузя гинэ кылемын на.
Со сяна, ялан ужась ӧрилэн кивалтӥсез вераз, Кун Кенешлэн берпуметӥ сессияз эскеремын вал ёрмисьёслы улон-вылонын юрттэт сётонъя законопроектэ ватсанъёс. Озьыен, трос квартираем юртын улӥсь мӧйы муртлы, со 70 арессэ тырмытӥз ни ке, капремонт понна тыриськонлэн 50 процентэз берытскоз, нош 80 аресъемъёслы — 100 процентэз. Та компенсациос сётӥськозы, пенсионер чылкак огназ улэ ке, яке быдэс семья — ужасьтэм пенсионеръёс ке. Светлана Кривилевалэн кылъёсызъя, ӵектонэз депутатъёс умоен лыдъязы но законопроектэз кыкетӥ лыдӟемен кутӥзы.
Кун Кенешлэн Тӧроезлэн нырысетӥ воштӥсез сӥзиз ветеранъёслы юн тазалык но шудбур.
Люкаськемъёсын вераськонэз азьланьтӥз Владимир Паршин. Со бырйисьёслэн наказъёссылэн быдэсъяськемзы сярысь вераз.