Йӧскалык ужпумъёсъя ужан амалъёсын тодматскон понна Удмуртие Татарстанлэн Кун Кенешысьтыз депутатъёс вуылӥзы

Йӧскалык ужпумъёсъя ужан амалъёсын тодматскон понна 26-тӥ куартолэзе Удмуртие Татарстанлэн Кун Кенешысьтыз депутатъёс вуылӥзы. Асьме элькунысь парламентлэн ёзчиосыныз ӵош соос Ижкарысь 97 номеро школае, Калыкъёслэн эшъяськон юртазы но Кузебай Герд нимо йӧскалык гимназие вуылӥзы, кылъёс сярысь катрадлыкез быдэсъян ужпумъёсъя котырес ӝӧк ортчытӥзы.
«Ми татчы лыктӥмы Удмуртиысь парламентэн кутэм катъёсты быдэсъян ужен тодматскон понна. Тӥляд туж трос тунсыкоез, ми вуылӥмы Калыкъёслэн эшъяськон юртазы. Синмаськимы солэн чеберезлы, умой радъямезлы, ужамезлы. Тӥляд вань тунсыкоез, мар милям кытын ке ӧвӧл, но милям но вань тунсыкоез. Милем вань марлы ог-огмылэсь дышетскыны», — вераз Татарстанысь Кун Кенешлэн дышетонъя, лулчеберетъя, тодосъя но йӧскалык ужпумъёсъя комитетлэн кивалтӥсез Разиль Валеев.
Котырес ӝӧк сьӧрын Удмуртиысь йӧскалык политикая министерстволэн но дышетонъя министерстволэн ыстэм муртъёссы веразы, кыӵе югдур элькунын кылъёсты дышетон ласянь — 216 школаын удмурт кылэз дышето, 14 — бигер но 5 — пор кылъёсты. Нылпи садъёсын со лыдпусъёс — 229, 20 но 4.
Удмуртиысь печатья но калыке ивортодэт вӧлмытонъя агентстволэн кивалтӥсез Алексей Воронцов элькунын иворъёсты вӧлмытӥсь йӧскалык ёзэсъёсъя югдурен тодматӥз.
Котырес ӝӧклы йылпумъянъёсъя таӵе ӵектонъёс вуизы:
— йӧскалык кылъёсын чеберлыко литератураез но дышетон пособиосты нылпи садъёсы вуттонэн герӟаськем ужпумъёсты сэрттон-перчтон амалъёсты эскерон;
— Татарстанын удмурт лулчеберетэз дышетонъя элькун ресурс центръёс кылдытоно;
— Татарстанысь но Удмуртиысь Калыкъёслэн эшъяськон юртъёссылэсь, Йӧслыкъя юртъёслэсь но йӧскалык лулчеберетъя центръёслэсь ужан амалъёссэс, интызэс но луонлыкъёссэс мыло-кыдогес кутыны.
«Ужъюлтошъёсты гинэ ӧвӧл, ми союзникъёсты шедьтӥмы, азьланяз соосын ӵош ужаломы. Ми валаськомы, Россия — одӥг кун, валтӥсез отын — лулчеберетъёслэн, калыкъёслэн но кылъёслэн пӧртэмлыксы. Кыӵе ке кылэз ыштыса, ми Россиез ыштыны быгатомы», — вераз Удмуртиысь Кун кенешлэн йӧскалык политикая, мерлык кышкыттэмлыкъя, регламентъя но ужез радъянъя ялан ужась ӧрилэн кивалтӥсез Энвиль Касимов.
Озьы ик со пусйиз, туннэ кун кылъёсты дышетонын элькунъёс ог-огзэс валало но ог-огзылы юртто, угось Удмуртиын бигер кылэз дышето, нош Татарстанын — удмурт кылэз.