«Единая Россия» партилэн нырысь-валысь куара сётоназ 100 сюрс пала бырйисьёс пыриськизы

«Единая Россия» партилэн нырысь-валысь куара сётоназ 100 пала бырйисьёс пыриськизы. 22-тӥ куартолэзе элькунын 235 быръён участокъёс ужазы.
«Куара сётонэ 100 сюрс пала бырйисьёс пыриськизы, со 8 процентлэсь трос», — ивортӥз журналистъёслы Удмуртиысь Кун Кенешлэн Тӧроез Владимир Невоструев.
Солэн кылъёсызъя, трос калык вал ёросъёсын. «Куд-ог участокъёсы 1–1,5 сюрс адями вуылӥз», — вераз элькун парламентлэн кивалтӥсез.
Ӝожтӥськонъёс сярысь верано ке, соосты комитетын эскерозы. Куара сётон вылын шӧдӥськыны быгатымон тырмымтэос ӧвӧл. «Бадӟым ӝожтӥськонъёс ӧвӧл — кытын ке, кылсярысь, списокъёс вурӟымтэ вылэм. Тросаз участокъёсын чакласьёс вал, соос ӧриослэн ужазы мыло-кыдо пыриськизы», — вераз Владимир Невоструев.
Озьы ик солэн пусъемезъя, кӧня ке участокъёс огазеямын вал, «соин ик куд-ог интыосын бадӟым лыдпусъёс». «Черодъёс вал, азьланяз праймеризъёсты ортчытыку, сое лыдэ басьтомы. Быръён ӧриосын, оло, тросгес ёзчиосыз луозы. Мукет улосвылъёсын ӵошатоно ке, милям быръёнъёс огсыр ортчизы», — пусйиз Невоструев.
Тодэ вайытом, вань бырйисьёслы кык бюллетень сётэмын вал: одӥг мандатъем округъя но партилэн списокезъя куара сётон понна. Бырйыны яра вал кӧня ке кандидатъёсты. Праймеризлы йылпумъянъёс тодмо луозы 25-тӥ куартолэзе.