Депутатъёс таза улонэн эшъяськизы

Кун Кенешысь депутатъёс, аппаратын ужасьёс быдэс арня ӵоже дышетскизы таза улонэн эшъяськыны.
«Таза сюлэмлэн арняез» радъяз Тазалыкез утёнъя министерство. Со улсын элькун парламентын пӧртэм ужрадъёс ортчизы. Нуналлы быдэ чузъяськизы лекциос — специалистъёс валэктӥзы валаса сиськонлэн, ӵукнаосы зарядка лэсьтонлэн, чылкыт омырын поръянлэн кулэлыксы сярысь. Ваньзэ тае парламентарийёс ас вылазы но мертазы. Кылсярысь, соослы ӵектэмын вал лифтлэсь куштӥськыны. Озьы куд-огез 8-тӥ — 9-тӥ этажъёсы но пыдын тубазы.
— Ёзвиосты кыдатон мугорлы шумпотон гормонъёсты уноятыны юрттэ, — шуиз Кун Кенешысь Тазалыкез утёнъя, демографияя но семья ужпумъёсъя ялан ужась комиссилэн кивалтӥсез Светлана Кривилёва. — Соин ик таза улонэн эшъяськись мурт ӵемгес мыня, капчи мылкыдын ветлэ.
Берпуметӥ нуналаз вань мылкыд карисьёс дышетскизы пӧртэм шуг-секытъёсты вормыны. Специалистъёс валэктӥзы: капчияк кышкатскон, керӟегъяськон мугорлы пайдаё но луэ. Со кема уг кыстӥськы ке. Нош урод мылкыдлы пуромыны уз сётэ яратоно уж, эшъёс, нош ик — чылкыт омыр, ёзвиосты кыдатон. Ваньмыз та юрттоз сюлэмлы но таза луыны.