Удмуртиысь Кун Кенешысь депутатъёслэсь лыдзэс 2017-тӥ арын быръёнъёслы кулэстыны быгатозы

2017-тӥ арын быръёнъёслы дасяськон улсын Удмуртиысь Кун Кенешысь депутатъёслэсь лыдзэс кулэстыны малпало, али отын 90 адями ужа. 20-тӥ куартолэзе ужпумез эскеризы элькунлэн тӧроез Александр Соловьёв дорын.
Пумиськонэ пыриськизы Удмуртиысь Кун Кенешлэн Тӧроез Владимир Невоструев, элькунысь Быръёнъёсъя валтӥсь ӧрилэн кивалтӥсезлэн воштӥсез Жанна Дворцова, тӧролэн но кивалтэтлэн администрацизылэн кивалтӥсезлэн воштӥсез — эрикрадъя управленилэн кивалтӥсез Владислав Поджаров.
Росси но улосвыл катрадлыкъя элькун парламентын 35–90 адями луыны быгатэ. Пумиськонэ люкаськемъёс одӥг малпанэ вуизы — вуоно ӧтчамын калыкен быръёмъёслэсь лыдзэс кулэстоно. Со понна Удмуртиысь Кун Кенеш сярысь катэ воштонъёс пыртоно луоз. Ужпумез эскерозы али ужась депутатъёсын, политика партиослэн азьветлӥсьёсынызы, калыкен.
Тодады вайытом, Удмуртиысь Кун Кенешлэн 2012-тӥ арын быръем витетӥ ӧтчамаз 90 депутатъёс ужало. Кылем быръёнъёс азьын парламентарийёслэн лыдзы 10 адямилы кулэстэмын вал.