Кун Кенешын наркотикъёсын нюръяськон ужпумъёс сярысь кенешизы

Кун Кенешысь Нациосын ужан политикая, кышкытлыклэсь утиськонъя, Регламентъя но Кун Кенешлэсь ужзэ радъянъя ялан ужась ӧри Егитъёслэн парламентэнызы ӵош ортчытӥз наркотикъёсын нюръяськонлы сӥзем котырес ӝӧк.
Пумиськонэ вуизы трос кивалтӥсьёс но егитъёс. Югдурез утёнъя министерствоысь участковойёсын но быдэ вуымтэосын ужанъя ёзлэн кивалтӥсезлэн воштӥсез Вероника Малькова пусъе: министерство наркотикъёсын нюръясконлы сӥзем трос ужрадъёс ортчытъя – «Мак», «Полицилэн школаез», «Пӧсь телефон», рейдъёс, школаосын лекциос.
Озьы ке но, наркотикъёсын кушласькисъёслэн лыдзы арысь аре будэ. Таин сэрен шузимытӥсь суретъёсын герӟаськем йыружъёс но йыло – кылем арын 2 сюрс 554 вал. Та пӧлысь бадӟым люкетэз пусъемын Ижын.
Вань мылкыдъёсты но малпанъёсты кылзэм бере Нациосын ужан политикая, кышкытлыклэсь утиськонъя, Регламентъя но Кун Кенешлэсь ужзэ радъянъя ялан ужась ӧрилэн кивалтӥсез Энвиль Касимов шуиз: «Кылдытоно быдэс арлы календарь. Пӧртэм министерствоос, ӵош кариськыса, егитъёс пӧлын таза улонэз пыӵатонъя ужрадъёсты мед чаклалозы».
Кун Кенешлэн депутатэз, элькунысь наркодиспансерлэн валтӥсь врачез Татьяна Карлова дэмлаз на: пиналъёслэсь наркотикъёсын кушласькемзэс шараян понна школаосын тестирование ортчытъяськомы, нош нылпиосын ужасьёсты нокин уг чакла.
- Тае возьмато учыръёс. Кылсярысь, диспансерысь огез эмъясьмы, пиналзэ нылпи садэ вайыса, туж паймиз: воспитатель милям висисьмы вылэм. Валамон: туннэ та кышномурт садын уг ужа ни, - вераз врач.
Туннэ егитъёс пӧлын паськыт волмемын шузимытӥсь суретъёсты кыскон. Соос героинлэсь но кышкытгес луо. Угось улонэз син куспын куасалто. Озьы ик кышкыт луо спортсменъёслы чаклам куд-ог таблеткаос. Трос егитъёс мугорзэс кыдато тренажёр залъёсын. Нош отын ӵемысь дэмлало кужымез, чиданэз будэтӥсь «бирдыосты». Туннэ тодмо ни: соос лулсэрез тӥяло – пиналъёс лек но керӟег луо. Угось отын вань наркотик суретэз.