Ижкарысь «Столичный» микрорайонын школа пуктон интые нырысетӥ из понӥзы

Ижкарысь «Столичный» микрорайонын школа пуктыны ӧдъязы. Лэсьтӥськонлы сиё-дано кутскон сётӥзы 4-тӥ куартолэзе. Нырысетӥ свай жугонэ пыриськизы Удмуртилэн тӧроез Александр Соловьёв, Кун Кенешлэн Тӧрӧез Владимир Невоструев, нимысьтыз лэсьтӥськонъя 8 номеро управленилэн кивалтӥсез Алексей Прасолов, Удмуртиысь кивалтэтлэн но Ижкар администрацилэн ыстэм муртъёсыз.
Выль микрорайонын 25 сюрслэсь трос адями улоз, та школа отын нырысетӥез луоз.
«Столичнойын туннэ праздник, ми 825 интылы выль школаез пуктыны кутскиськомы. Ми бадӟым федерал программае шедимы, соя Удмуртиын матысь 10 аръёсы 30 выль школа пуктэмын луоз, со пӧлысь дасэз Ижкарын, кызез — Удмуртиысь ёросъёсын. Эшшо 16 пала школаос быдэсак выльдэмын луозы. Ми ваньзэ сое лэсьтомы, 2025-тӥ арозь ваньмыз пиналъёс одӥг сменаын гинэ мед дышетскозы шуыса, школа бере соос ватсаса тодон-валанъёс сётӥсь ужъюртъёсы ветлыны мед быгатозы. Со программалы Росси кивалтэт асьме элькунлы гинэ 25 миллиард манетлэсь трос коньдон висъялоз», — пусйиз Александр Соловьёв.
Чакланъёсъя, школаез таяз арын толсуре вуттозы. Алексей Прасоловлэн верамезъя, та ӵектос вуоно инъет ӵектос сямен кылдытэмын, со Удмуртиын школаосты пуктон дыръя трос пол кутӥськылоз.
Тодэ вайытом, 2016-тӥ арын Удмуртия выль школаосты пуктонъя федерал программае пыриз, со 2016–2025 аръёслы чакламын. Элькунын пуктэм нырысетӥез дышетсконни луоз Столичнойын пуктэмез. Ӵектослэн дуныз 600 миллион манет. Солэсь 30 процентсэ тыроз Удмуртия, кылемзэ ас вылаз басьтоз федерация.