Тулыс бусы ужъёсты нуыны Удмуртиысь гурт возёсъёс 1 миллиард манет пала басьтӥзы

Тулыс бусы ужъёсты нуыны Удмуртиысь гурт возёсъёс 1 миллиард манет пала басьтӥзы. Тросэз гурт но фермер возёсъёс кизён техниказэс толалтэ ини выльдӥзы но 20-тӥ оштолэзьлы бусыосы потыны быгатозы. 14-тӥ оштолэзе журналистъёсын пумиськылыкуз со сярысь ивортӥз Кун Кенешысь агропром огъетъя, музъем кусыпъёсъя, инкуазь узырлыкез уже кутонъя но инкуазез утёнъя ялан ужась ӧрилэн кивалтӥсез Владимир Варламов.
«Ваньмыз кутске бусыысен. Кизён ужъёсты ортчытыны ми туннэ нуналлы 1 миллиард манет пала сётӥмы. 758 миллионэз — федерал коньдэтысь, 132 миллионэз — элькунысь, оглом миллиард манет котыр. Эшшо 149 миллион манет ми туэ сётӥмы йӧллы пунэмъёсты берыктон понна. Агропром огъетлы коньдэтъёсысь юрттэт урод висъяське шуыны уг яра. Эстӥськон асьсэос возёсъёс дасяло. Туннэ нуналлы кулэяськон 80 процентлы тырмытэмын. Кылем ар понна пунэмъёсты ми туэ берыктӥмы. Кизён но музъемен ужан техника сярысь верано ке, элькунамы югдур туж урод ӧвӧл», — вераз Владимир Варламов.
Ӧрилэн кивалтӥсез верамъя, коньдонэн юрттэт висъян ласянь туэ бадӟым саклык висъяське ю-тысез куасьтон, пудо сиёнэз но ю-тысез утялтон техника басьтонлы.
«Чурыт вераны быгатӥсько, тулыс ужъёсты умой ортчытон понна, гуртоослэн кизён техниказы вань», — пусйиз депутат.
Нялтас вераса, 2015-тӥ арын элькунысь гурт возёсъёс но сиен-юон поттӥсьёс 67 миллиард 300 миллион манет тыр ваньбур поттӥзы. 2014-тӥ арен ӵошатыса, со 2 процентлы тросгес. Йӧл 0,7 процентлы уногес кыскемын, мукет вузъёс но йылэтэмын. Сӥль - 1 процентлы, картофка — 17, кырын будэтэм бакча сиёнъёс — 16, йӧллэсь сиен-юонъёс — 12, нӧкы вӧй — 5, сыръёс — 43 процентлы.