«Улосвылъёслы-доноръёслы» коньдонэн юрттэт сётон сярысь Удмуртиын дасям катӵектосэз Россиысь Кун Думаын эскерыны кутскизы

«Улосвылъёслы-доноръёслы» коньдонэн юрттэт сётон сярысь Удмуртиын дасям катӵектосэз Россиысь Кун Думаын эскерыны кутскизы. Нырысетӥез кенешон 12-тӥ оштолэзе ортчиз. Со сярысь вераз элькунысь Кун Кенешлэн тӧроезлэн воштӥсез, бюджетъя, вытъёсъя но коньдон ужпумъёсъя ялан ужась ӧрилэн кивалтӥсез Софья Широбокова.
Кичӧлтонэз эскеризы федеративной устройствоя но интыын аскивалтон ужпумъёсъя комитетын.
«Комитет Россиысь трансфертъёсты люкылонъя радлыке ватсанъёс пыртыны кулэлыкез пусйиз. Со улосвыллэсь вытъёсъя луонлыкъёссэ лыдэ басьтыны кулэ. Озьы ик Росси кивалтэт та ужпумез сакгес мед чаклалоз шуыса веразы. Жаляса верано, кивалтэт та ӵектонлы дур уг басьты, малыке шуоно 71 улосвыл ватсаса дотациослы уг кулэяськы», — вераз Софья Широбокова.
Парламентлэн вице-спикерез верамъя, али кичӧлтонлы дурбасьто 12 улосвылъёс гинэ, соос люкам вытъёссылэсь бадӟым люкетсэ федерацие келяло.
Жоген катӵектосэз бюджетъя но вытъёсъя ӧрилэн кенешоназ эскерозы. Отын солы дур ӧз басьтэ ке, Удмуртия мукет сюресъя мыноз — депутатъёс федерациысь трансфертъёсты улосвылъёслы люкылонъя методикае но коньдэт кусыпъёсъя концепцие тупатонъёсты дасялозы.
Тодэ вайытом, элькунысь Кун Кенеш ӝыныезлэсь троссэ вытъёссэс федерацие келясь улосвылъёслы ватсаса юрттэт сётон сярысь катӵектосэз кылдытӥз.
«2014-тӥ арын Удмуртиын 127 миллиард 400 миллион манет тыр вытъёс бичамын вал. Отысь 82 миллиард 200 миллион манетэз яке 65 процентэз федерал коньдэтэ кошкиз. Элькунэ кылиз 35 процентэз яке 45 миллиард 200 миллион манетэз. Со валтӥсь мерлыко ужпумъёсты гинэ быдэстыны тырме», — верамын федерал катлэн ӵектосэзъя валэктонын.
Элькунын бичам вытъёсты шори люкон ужпумъя Удмуртилэн тӧроез Александр Соловьёв алигес кенешиз Росси азьмуртэн Владимир Путинэн. Элькун кивалтӥсьёс та юанэз ик ӝутӥзы Москваын Удмуртилэсь нуналъёссэ ортчытон дыръя но.
2000-тӥ арын Удмуртия бичам вытъёсызлэсь 42,5 процентсэ федерацие сётӥз, нош 2015-тӥ арын — 65,7 процентсэ.