Кун Кенешын студентъёслы чаклам урокъёсты ортчыло

Ӟеч сямлы пӧрмиз ни Кун Кенешын студентъёслы чаклам урокъёсты ортчытон. Та арня вискын парламентэ вуылӥзы Ижысь М. Т. Калашников нимо техникая университетысь студентъёс. Урокез нуиз Кун Кенешысь Наукая, дышетонъя, культурая но егитъёсын ужан политикая ялан ужась комиссилэн кивалтӥсез Наталья Сударикова. Студентъёсын пумиськонэ пыриськиз Тӧро Владимир Невоструев но. Со ивортӥз Кун Кенешлэн матысь дырлы чаклам ужъёсыз сярысь. Кылсярысь, туэ 27-тӥ апреле пусъёмы кунамы парламентаризм кылдэм-юнмам дырысен 110 ар тырмонэз — талэсь палэнэ уз кыле Кун Кенешысь депутатъёс но. Со сяна, туэ сӥзьыл быръёмы Кун Думае, интыосысь кенешъёсы депутатъёсты — элькунмыя гинэ ваньзэ-ӧвӧлзэ быръёно луоз 3 сюрс 500 депутатъёсты. Владимир Невоструев егитъёслы вазиськиз, кунмес радъянэ соос но мылысь-кыдысь мед пыриськозы шуыса.
Урокын трос тунсыкозэ мадизы Удмурт кун университетысь Историяя но социологиия институтысь дышетӥсь Наталья Бармина, элькунысьтымы Быръёнъя комиссилэн кивалтӥсезлэн воштӥсез Наталья Глухова, Кун Кенеш бордысь Егитъёслэн парламентсылэн кивалтӥсез Сергей Колегов. Студентъёс урокысь трос тодон-валан люкаса кошкизы.