Удмуртиын участковой полицейскойёс уг тырмо

Удмуртиын 23 участковой полицейскойёс уг тырмо. Кун Кенешлэн йӧскалык политикая, мерлык кышкыттэмлыкъя, Регламентъя но ужез радъянъя ӧрилэн кенешоназ 7-тӥ оштолэзе со сярысь ивортӥз элькунысь кунпуш ужъёсъя министрлэн воштӥсез Сергей Поволоцкий.
«Али Удмуртиын 422 участковойёс, 23 мурт уг тырмы. Адямиос уг жегастко, жаляса верано, та уж борды уг возисько. Алонъя учётын 50 сюрс кунмуртъёс пусъемын, 27 сюрс палаез отысь — пыӵал тӥрлык возисьёс, 7 сюрсэз — административной кылкутон улэ шедемъёс, 20 сюрсэз — семьяязы куашетӥсьёс, суд улэ шедьылэмъёс, наркоманъёс, юисьёс… Участковой котькудӥныз пумиськылыны кулэ. Одӥг участковой нуналаз 3–4 адями доры вуылыны кулэ, со сяна мукет ужъёс вань на», — вераз Сергей Поволоцкий.
Ӧрилэн кивалтӥсез Энвиль Касимов верамъя, Удмуртиын участковойёс понна улон инты ласянь но сюлмаськонъёс вань. Пумиськыло учыръёс, куке полициысь ӧнерчи Чайковскийын улэ, нош ужаны котькуд нунал Вотка ёросэ ветлэ.
Татарстанын но Башкортостанын нимысьтыз программа ужа. Соя участковойёслы опорной пунктэн юртъёс пукто: солэн оглюкетаз — улон инты, мукет палаз — полицилэн пунктэз. Тодэ вайытом, со выллем юртъёс пуктыны курыса миым толсуре вазиськиз Удмуртиысь кунпуш ужъёсъя министр Александр Первухин.