«Единая Россия» партилэн Удмурт ёзэзлэн интыосысь приёмнойёсаз ужасьёс люкаськылӥзы

Кун Кенешысь «Единая Россия» фракция огазе люказ «Единая Россия» партилэн Удмурт ёзэзлэн интыосысь приёмнойёсаз ужасьёсты.
Кун Кенешлэн Тӧроез, «Единая Россия» партилэн секретарезлэсь ужзэ быдэсъясь Владимир Невоструев ивортӥз элькунамы партилэн праймеризэз кутскем сярысь. Озьы Кун Думае быръёнъёсы ӵектыны луоз тужгес устооссэ, визьмооссэ кандидатъёсты. Та вакытэ праймеризэ ӵектӥськем 22 мурт кужымзэ мерта дебатъёсын. Владимир Невоструев интыосысь ёзъёсын тыршисьёслы куронэн вазиськиз: та дебатъёслэсь ортчемзэс возьматыны тыршоно котькытын — городын, ёрос центрын, гуртъёсын. Со понна уже кутоно Интернетэз, туала техникаез. Калык мед адӟоз дебатъёслэсь ортчемзэс. Тужгес кельшымон адямизы понна куара сётыны луоз 22-тӥ куартолэзе. Кудӥз понна дурбасьтӥсьёс тросгес люкаськозы — соос ик шедёзы «Единая Россия» партилэн улосмыя ӵектэм списоказ. Со дась луоз партилэн съездэзлэн кыкетӥ люкетаз — таиз ортчоз июне.
Партилэн кивалтӥсезлэн Дмитрий Медведевлэн Ижысь приёмноезлэн ужамезлы йылпумъянъёс лэсьтӥз солэн кивалтӥсез, Кун Кенешлэн Тӧроезлэн воштӥсез Светлана Кривилёва. Кылем арын партилэн Удмурт ёзэзлэн интыосысь приёмнойёсаз вазиськиз 9 сюрс 815 мурт. Та лыдпус, валля арен ӵошатыса, йылӥз 21 процентлы. Калыкез тужгес но сюлмаськыто улон интыен, кунлэсь юрттэт басьтонэн, тазалыкез утёнэн герӟаськем ужпумъёс. Калыклы юрттон паськыт радъямын «Единая Россия» валэктэ» проект пыр. Со улсын Ижысь приёмнойын нуналлы быдэ ужа огъя телефон: вазиськонъёсты кутэ 4 специалист, соосты сэрттыны-пертчыны келяло я Кун Кенешысь депутатъёслы, я мукет ёзъёсы.
Светлана Кривилёва пусйиз, калык мед тодоз: партия дась лэчыт ужпумъёсты сэрттыны-пертчыны.
Кун Думае депуатэ кандидатъёсты быръён пумысен ивортӥз «Единая Россия» партилэн Удмурт ёзэзлэн исполкомезлэн кивалтӥсез Андрей Макаров. Праймеризэ ӵектӥськемъёс дебатъёсы пыриськозы 15-тӥ куартолэзёзь, нош 22-тӥ куартолэзе соос понна куара сётон радъяськоз. Отчы пыриськыны быгатоз котькуд адями. Элькунамы со нуналэ куараосты кутозы 235 интыын.