Кун Кенешлэн Президиумез пумиськылӥз парламентэ шедьымтэ партиослэн азьветлӥсьёсынызы

Удмурт Элькунысь Кун Кенешлэн Тӧроез Владимир Невоструев кивалтэм улсын парламентэ пырисьтэм партиослэн советсылэн кенешез ортчиз. Кунэз радъянъя но интыысь аскивалтонъя ялан ужась ӧрилэн кивалтӥсез Наталья Кузнецова люкаськемъёслэн тодазы уськытӥз: туэ куарусёнэ, Кун Думае сяна, быръёмы на интыосысь депутатъёсты но. Сояз но, таяз но кужымзэс мерталозы пӧртэм партиос. Наталья Кузнецова ивортэмъя, элькунысьтымы поселениослэн лыдзы 7-лы кулэсмиз. Со сяна, интыосысь депутатъёсты быръён ласянь туэ куд-ог воштӥськонъёс пыӵаны кутскозы. Соосты депутатъёс эскерозы вуоно сессиын.
Кун Кенешен герӟаськем ужпумъёс сяна, партиослэсь азьветлӥсьёссэс тужгес но тунсыкъяськытӥз сюресъёсын герӟаськем ужпум. «Яблоко» партилэн ёзчиез кичолтонэн потӥз: сюрес лэсьтӥсь предприятиос куспын конкурсэз ӟечгес радъяно. Чузъяськизы мукет ӵектонъёс но: кылсярысь, сюрес лэсьтонэз чаклась группа кылдытоно. Кивалтӥсьёс, министръёс сяна, отчы мед пыриськозы калык огазеяськонъёсысь адямиос. Кун Кенешлэн Тӧрӧез Владимир Невоструев та группаез кылдытыны оскиз Экономикаын политикая, промышленностья но инвестициосъя ялан ужась ӧриен кивалтӥсьлы Валерий Бузиловлы.