Удмуртиысь Кун Кенешын егитъёсты ИГИЛэ кысконлы пумитъяськон амалъёс сярысь вераськизы

Егитъёсты ИГИЛэ (Россиын лэзьымтэ огазеяськон) кысконлы пумитъяськон амалъёс сярысь вераськизы 23-тӥ южтолэзе Удмуртиысь Кун Кенешын. Котырес ӝок сьӧрын кенешонэз нуиз йӧскалык политикая, мерлык кышкыттэмлыкъя, Регламентъя но элькун парламентлэсь ужзэ радъянъя ялан ужась ӧрилэн кивалтӥсез Энвиль Касимов.
«Адӟон артэ. Асьме кунмы пумит ож мынэ. Солэн оглюкетэз калыкез террористъёслэн Россиын лэзьымтэ огазеяськоназы кысконэн герӟаськемын», — пусйиз Энвиль Касимов.
Экспертъёслэн верамзыя, Россиын берло дыре 2 сюрс 500-лэсь трос адями вербовщикъёс улэ шедиз. Соослэн кылъёссылы оскисьёс пӧлын тросгес 23 аресозь пиос но нылъёс. Пиосты ожмаськонъёсы келяло, нылъёс ӵемгес рабыняос луо. Террористъёслэн огазеяськонъёсазы кошкем улосчиосмылэсь лыдзэс чотаны шуг.
«Удмуртиысь ог 10 адями, ми ум тодӥське, кытын соос. Луыны быгато «Правый секторын», Донбассысь ополчениын, ИГИЛын. Ми тодӥськомы соослэн Удмуртиысь кошкемзы сярысь гинэ», — вераз журналистъёслы Удмуртиысь мерлык кышкыттэмлыкъя Советлэн секретарез Александр Ярославцев.
Озьы ик со терроризмлы но ИГИЛлы дурбасьтӥсь Удмуртиысь воргоронэз кылкутон улэ кыскем сярысь вераз. Пиосмурт 200 сюрс манет штраф тырытэмын но 1 арлы колоние-поселение келямын.
Удмуртиысь кунпуш ужъёсъя министерстволэн дышетонъя Центрысьтыз ӧнерчи Ирина Фоменко верамъя, вербовщикъёс асьсэлы дурбасьтӥсьёсты ӵемгес шедьто мерлыко герӟетъёсысь но тодматскон бамъёсысь. Ас палазы капчиенгес берыкто асьсэлы оскисьтэм, огназы улӥсь, котырысьтызы адямиосын валамтэ, улонысьтызы шугъяськонъёслэсь кошкыны тыршись муртъёсты. Соосты умойтэм вамышлэсь возьыны быгато семьязы но матысь адямиоссы.
Ижкарысь мусульманъёслэн огазеяськонъёссылэн ыстэм муртъёссы веразы, вӧсьлык ужпумъёсын экстремизм мылкыдъёслы пушйыны ӧвӧл сётоно шуыса.
«Мар ми быгатӥськомы — индылонъёс, шутэтскон нуналъёсы ужась школаын дышетонъёс - лэсьтӥськомы. Милям мечетямы ветлӥсьёслэн сыӵе малпанъёссы ӧвӧл. Ми вераськомы, со исламлы матын но ӧвӧл шуыса» — вераз Ижкарысь Соборной мечетьысь имам-хатыб Исмагил-хазрат.
Люкаськемъёс озьы ик огкылэ вуизы, егитъёс пӧлын валэктон уж нуонэ пыриськыны кулэ элькунысь Егитъёслэн парламентсылэн ёзчиосыз но иворъёсты вӧлмытӥсь ёзэсъёс.