«Земский доктор» программая миллион манетэз сётыны кулэ эм удысъя вылӥ дышетсконниосты йылпумъясьёслы гинэ

«Земский доктор» программаез быдэсъян но элькунысь эм удысын ужасьёслы мукет мерлыко юрттэт сётон ужпумъёсты эскеризы 17-тӥ южтолэзе Кун Кенешлэн президиумаз. Элькун парламент «Земский доктор» программая миллион манетэз сётыны ӵектэ эм удысъя вылӥ дышетсконниосты йылпумъясьёслы гинэ. Со сяна, егит ӧнерчиос со коньдонэз улон инты гинэ басьтыны кутыны кулэ. Одно ик отын, кытын интыяськемын соослэн эмъяськоннизы. Россиысь Кун Думае сыӵе кичӧлтонэн потыны ӵектӥз элькун парламентлэн тӧроезлэн нырысетӥ воштӥсез Светлана Кривилёва.
Озьы ик ӵектэмын эмчиез гуртын 5 ар ужатыны, нылпиен одӥг но ӝыны аресозь пукон лыдэ уг басьтӥськы.
Туж ӧжытэз эмчиос улон инты гуртын басьтӥзы — уноез карын патер басьтоно кариськизы. Юалляськон ортчытыса, сыӵе йылпумъянэ вуизы Удмуртиысь Егитъёслэн парламентсылэн ёзчиосыз.
Кызьы возьматӥзы эскеронъёс, уноез егит эмчиос Дэри ёросын ужало. Нош ӧнерчиослы кулэяськон тросаз ёрос эмъяськонниосын вань. Соин ик Светлана Кривилёва ӵектӥз: Тазалыкез утёнъя министерстволы егит ӧнерчиосты муниципал кылдытэтъёсы лэзьыны эрикрад сётоно.
«Туннэ Тазалыкез утёнъя министерство уг пусйы, кытчы келяно ӧнерчиосты. Соос асьсэос быръё, кытчы мыныны: Дэрие яке Сюмси ёросэ, кытын эмчиослы кулэяськон шӧдскымон бадӟымгес. Мон малпасько, сое радъяны кулэ. Асьмелэн вань бере луонылыкмы 40 ӧнерчиослы юрттэт висъяны, сое сётоно отчы, кытын кулэгес», — дурбасьтӥз кичӧлтонлы Кун Кенешлэн Тӧроез Владимир Невоструев.
2012–1015 аръёсы гурт ёросъёсы ужаны мынӥзы но миллион манетэн юрттэт басьтӥзы 393 эмчиос. 40-эз со пӧлысь — 2015-тӥ арын. Туэ соос 25 кузя луозы.
Федерал катрадлыке пыртэм воштонъёсъя, 2016-тӥ арын сыӵе юрттэт басьтозы гурт ёросъёсы, рабочий посёлокъёсы, каргуртъёсы мукет интыосысь мынэм 50 аресозь эмчиос. Со сярысь ивортӥз тазалыкез утёнъя министрлэн воштӥсез Андрей Воздвиженский.