119 квартирае интыяськозы шоркарысь анай-атайтэк кылем егитъёс

Ижысь Ракетной ульчаысь 17 этажъем юрт йылаз-пумаз вуиз. 119 квартирае интыяськозы шоркарысь анай-атайтэк кылем егитъёс. Корка пыронэ вуизы элькунлэн Тӧроез Александр Соловьев, Кун Кенешлэн Тӧроез Владимир Невоструев, Правительстволэн Тӧроез Виктор Савельев но мукет кивалтӥсьёс.
— Та юрт — бадӟым ужлэн пичи люкетэз гинэ, — люкаськемъёс азьын кыл вераз Александр Соловьев. — Мумы-бубытэк кылем нылъёслы-пиослы берло аръёсы ми бадӟым саклык висъяськомы. Угось ӵемысь кылыны кутскимы: та егитъёсты эрекчало — ларгам коркаосы интыяло. Таӵе учыръёс медаз луэ шуыса, кылдытӥмы нимысьтыз фонд. Отчы пыртэмын 298 улон сэрег: Вотка, Дэри, Эгра, Каракулино, Кез, Ува, Якшур-Бӧдья ёросъёсын но вань городъёсын. Озьы черод шаплыгес ортче.
Элькун Тӧро ивортӥз: туэ сирота нылпиослы улон инты висъянлы асьме бюджетысь чакламын 234 миллион манет. Федерал бюджетысь вуоз 72 миллион манет. Ас сэрегзэс витё 3 сюрслэсь ятыр анай-атайтэк кылемъёс. Та пӧлысь бадӟым люкетэзлы тырмемын ни 18 арес.
— Куд-ог адямиос нырысь вуӵыртӥзы, — вера дышетонъя но наукая министр Алексей Мирошниченко, — малы, пе, одӥг коркае сирота егитъёсты интыяськоды? Йыртэманъёс алялозы. Но ми оскиськомы егитъёслы. Татын шумпотон гинэ мед кузёяськоз!
Сирота нылъёс-пиос пӧлысь огез — Ксения Пархоменко — министрлэсь верамзэ пеляз понӥз. Оскытӥз: чебер юртын улон-вылонмы но, пе, одно ик чебер луоз.
Собере люкаськемъёс выль коркае пыризы. Вань квартираосын комнатаез одӥг — 25 квадрат метр, студия амалэн быдэстэмын. Туннэ юртын шыпыт на. Та арня вискын со пачылмоз нылпи куараосын — егит семьяос татчы улыны выжозы.