Ёросъёслы ватсаса юрттэт сётон сярысь

Журналистъёсын пумиськылӥз Кун Кенешысь Экономикаын политикая, промышленностья но инвестициосъя ялан ужась комиссилэн кивалтӥсез Валерий Бузилов.
Депутат пыриськыны чакла Кун Думае быръёнъёсы. Но отчы кандидатъёс пӧлы шедён понна со кужымзэ мертаны кулэ «Единая Россия» партилэн праймеризаз. Кыӵе удысъёслы тужгес но бадӟым саклык висъялоз со аслаз программаяз? Валерий Бузилов пусйиз:
— Шаерамы интыяськемын бадӟым заводъёс — соостэк син шоры секыт пуктыны огъя Россилэсь обороназэ, кышкытлыклэсь утиськонзэ. Нош отын тыршо огшоры адямиос. Мон малпамъя, соослэн улонзы ӟечгес луыны кулэ. Озьыен, тужгес но бадӟым саклык висъяно экономикаез, промышленностез азинтонлы, соин валче калыклэсь улонзэ ӟечомытонлы.
Валерий Бузилов вератэк ӧз кельты мукет лэчыт ужпумъёс сярысь но. 2014-тӥ арлэн пумаз Дэри ёросысь кивалтӥсьёс вазиськизы Удмурт Элькунлэн Тӧроезлы Александр Соловьевлы: Дэрилы, пе, шоркар бордысь ёрослэн статусэз сётэмын луысал ке, ёросэз азинтыны но калыклэсь улонзэ ӝутыны паськытэсь луонлыкъёс усьтӥськысалзы.
Ёросын улэ-вылэ 68 сюрс 800 мурт. Шутэтскон нуналъёсы та лыдпус 3-4 поллы йылэ: шоркарын улӥсьёс Дэри ёросэ пуктэм коркаосазы бертыло. Дэри ёрослэн йырыз Андрей Коняшин ивортэмъя, 127 гуртъёс пӧлысь 16-яз улӥсьёс пусйиськемын Ижын. Шоркарысь калыклэн Дэри палъёсы кыстӥськеменыз но вылысьтыз вылаз коркаос ӝутэменыз сэрен Дэри ёросысь кивалтӥсьёс йыр бордазы кырмиськыны дась. Сюресъёс куашкало, трос кужым кулэ тылпулэсь утиськонэз но порядокез радъяны. Со сяна, Дэри ёросын йылэ эмъяськыны мылкыд карисьёслэн лыдзы. Кызьы ваньзэ тае вормод, ватсаса юрттэт ӧз луы ке?
Элькун Тӧро Александр Соловьев дэриослэн вазиськонзылы дурбасьтӥз. Кылдытэмын вал та ужпумез эскеронъя нимысьтыз комиссия. Та комиссилэн ужаз пыриськиз Валерий Бузилов но. Алигес со вуылӥз Дэри ёросысь Депутатъёслэн Кенешсылэн сессияз. Валерий Бузилов пусъемъя, ёроссылы ватсаса юрттэт сётон пумысен соос Кун Кенеше вазиськыны чаклало.
— 29-тӥ южтолэзе Кун Кенешлэн сессияз нырысетӥ лыдӟонэн эскеромы «Дэри ёрослы ватсаса юрттэт сётон сярысь» законлэсь проектсэ, — веранзэ азьланьтэ Валерий Бузилов. — Соя 2017-тӥ арысен дэриослы юрттэт висъяськоз пӧртэм удысъёсъя: сюресъёсты ӝутон но выльдон, лэсьтӥськон, школаосты, нылпи садъёсты, фельдшер-акушер пунктъёсты тупатъян, жуг-жаглы инты висъян, тылпулэсь утиськон но мукет. Вуоно арын дэриослы ватсаса висъяськоз 140 миллион манет.
Валерий Бузилов ватсаз на: Дэри ёрослы сямен ик, ватсаса юрттэт чакламын луоз Удмуртиысь мукет городъёс борды интыяськем ёросъёслы но: Сарапул, Можга, Глазов, Вотка ёросъёслы.