Коррупциен нюръяськон кужмоя

Депутатъёс табере уз быгатэ коньдонзэс кунгож сьӧрысь банкъёсын возьыны, доходъёссы сярысь декларация дыраз дасяно луозы но мукет. Озьы Владимир Невоструев кивалтэм улсын Кун Кенешлэн ортчем сессияз калыкен быръемъёс коррупциен нюръяськон вылысь 4 законъёсы воштонъёс пыртӥзы.
Депутатъёс пӧлысь ог ӝыныез — предприятиослэн но огазеяськонъёслэн кивалтӥсьёссы, табере соос депутат сямен кыл вераны уз быгатэ ас предприятиоссы понна.
— Шуом, ужпум ӝутӥськоз оглом тазалыкез утён удыс пумысен, — валэктӥз Национальной политикая, кышкытлыклэсь утиськонъя, регламентъя но Кун Кенешлэсь ужзэ радъянъя ялан ужась комиссилэн кивалтӥсез Энвиль Касимов. — Эмъян учреждениен кивалтӥсь депутат таӵе учыръёсы куара сётонэ пыриськыны быгатоз. Нош вераськон мынӥз ке, кылсярысь, 1 номеро элькун больница сярысь, солэн валтӥсь врачез мылкыдзэ вераны уз быгаты ни.
4-ез гинэ депутатъёс пумит луэмзэс веразы кунгож сьӧрысь счётъёсты быдтонлы но доходъёссы но расходъёссы сярысь дыраз декларация сётонлы. Угось табере калыкен быръемъёс декларациоссэс одно ик 1-тӥ оштолэзёзь вуттыны кулэ. Та куронэз ӧз быдэстэ ке, мандатсэс ыштозы.
— Вазен но таӵе курон вал ни, — шуиз Энвиль Касимов. — Но сокем чурыт ӧй вал со, соин ик куд-ог депутатъёс документъёссэс апрель пумозь но, маёзь но лэсьтыны вырылӥзы.
Кун Кенешлэн Тӧроез Владимир Невоструев коррупциен герӟаськем выльдӥськонъёсты туж умоен лыдъя. Депутатъёс, пе, асьсэос мед быръёзы: яке соос та куронъёсты быдэсъялозы, яке полномочиоссылэсь мед куштӥськозы.