Кун Кенешысь депутатъёс эскеризы 20-лэсь ятыр ужпумъёсты

16-тӥ тулыспалэ Кун Кенешысь депутатъёс люкаськылӥзы 22-тӥ сессиязы. Эскеремын 20-лэсь ятыр ужпумъёс.
Парламентлэн кылем арын ужамезлы йылпумъянъёс лэсьтӥз Кун Кенешлэн Тӧроез Владимир Невоструев. Депутатъёслэн ужамзылы со ӟеч дунъет сётӥз. Дыраз кулэ законъёс кутэмзылы, пӧртэм ужпумъёсты тыро-пыдо эскеремзылы луыса элькунмылэн экономикаез, шуг-секытъёс шоры учкытэк, юн возиське. Калыклы дыраз тырисько вань чаклам компенсациос. Туэысен коньдонэн юрттэт басьто ож вакытэ вордскемъёс — талы 2016-тӥ арлы бюджетын 41 миллион манет учкемын. Нылпи сад понна тыриськонлэсь мозмытэмын 1-тӥ но 2-тӥ группаен инвалид анай-атайёс. Кылем арын 186 егит дышетӥсьёс 1-тӥ арзэ ужамзы понна быдэн 40 сюрс манетэн басьтӥзы ни. Кыкетӥ араз таӵеослы быдэн 60 сюрс, 3-тӥ араз быдэн 80 сюрс манетэн чакламын.
— Кун Кенешысь котькудӥз ялан ужась комиссия ас удысъёсызъя законъёс бордын ужаз, — пусйиз В. Невоструев. — Оглом 104 законъёс юнматэмын, со пӧлысь 29-эз чылкак выль луо.
Нош кызьы соос быдэсъясько — депутатъёс чаклало, интыосы потаса но. Кылем арын Кун Кенешлэн нуналъёсыз ортчизы Глазовын но Дэриын. Та уж азинтӥськоз туэ но. Со сяна, туэысен Кун Кенешын муниципал кылдытэтлэсь нуналзэ ортчытъян сярысь кенешемын. Депутатъёсмылэн калык пӧлы потэмзылы синмасько мукет улосъёс но, кылсярысь, Киров улосын та амалэз пыӵатоно кариськизы ни. Уртче, ог-огмылэсь дышетскыса ужан сярысь огкылъёс Кун Кенеш кылем арын гожтӥз на Нижний Новгородысь Думаен, Москва городысь Думаен.
— Элькунмы понна туж пайдаё ортчизы Удмуртилэн Москваын нуналъёсыз, — пусйиз Кун Кенешлэн Тӧроез. — Оскисько, отын верам ӵектонъёсмы пӧлысь тросэз улонэ пыӵалозы. Кылсярысь, элькунысьтымы ог 65 процентэз люкам вытъёсмы туннэ Москвае кошко, таӵе улосъёс ог 10 гинэ кылемын на. Таин сэрен бюджетамы коньдон уг кыльы ни улосэз азинтонлы. Малпасько, Россия азьланьын тае лыдэ басьтоз но асьме кадь улосъёсты азинтыны юрттӥськоз.Нош туннэ депутатъёс ужано луо соин, мар вань. Озьы кылем арлы бюджет сярысь законэ соос 7 пол вошъянъёс пыртоно луизы, экономикаын югдурез лыдэ басьтыса. Туэ но сотэк уз луы. Шуо: шыръям сяна, коньдонэз поттыны но быгатоно. Дорамы тросгес кысконо инвестициосты, юрттоно пичи но шоро-куспо ужбергатонэн вырисьёслы. Озьы нимаз ужбергатӥсьёслы выт тыронэз капчиятыны юрттӥсь закон кутэмын вал. Солэн пайдаез кылем арын ик шӧдӥськиз: ас ужзэс усьтӥсьёс 8 процентлы йылӥзы — огъя Россиен ӵошатыса, со 2 поллы тросгес.
Кун Кенешын ужало 3 партиослэн фракциоссы но 1 депутат огазеяськон. «Единая Россилэн» ёзчиосыз тужгес трос: 88 депутат пӧлысь 69-эз. КПРФ-лэн фракцияз — 11, ЛДПР-лэн фракцияз — 6 депутат, 1-ез — «Справедливая Россилэн» огазеяськоназ. Ваньзы таос огкадь мыло-кыдо ужало законъёсты кылдытъян бордын. Кун Кенеш лыдэ басьтытэк уг кельты парламентэ сюрымтэ партиослэсь мылкыдъёссэс но — элькунамы соос 51.