Элькун бюджетэ воштонъёс пыртэмын

Владимир Невоструев кивалтэм улсын Кун Кенешлэн туннэ ортчем сессияз таиз арлы элькун бюджет сярысь катэ воштонъёс пыртэмын. Бюджетысь расход люкетэз ог 5,8 миллиард манетлы йылэтэмын. Тамында коньдон 0,1 процентъем кредит чот вуоз Россилэн бюджетысьтыз.
— Та коньдон ӧй вуысал, Удмуртилэн Тӧроез, Правительство Москваын ӧй ужасалзы, шаерамы югдурез отын ӧй валэктысалзы ке, — вераз Бюджетъя, вытъя но коньдон ужпумъёсъя ялан ужась комиссилэн кивалтӥсез Софья Широбокова. — Кылем арын куд-ог удысъёслы коньдон чакламлэсь ичигес висъяно луиз вал. Но табере соослы юрттыны луонлык кылдӥз.
Кытчы но малы со коньдон кошкоз — тупен-тупен мадиз коньдон ужпумъёсъя министрлэн воштӥсез Фарид Асадуллин:
— Ог 77 миллион манет кошкоз ӝог юрттэт сётонъя машинаос басьтонлы, 49 миллион манет — Можгаысь Сюлэм но сэр висёнъёсъя центре тӥрлык басьтонлы, 29 миллион манет — учебникъёслы…
5,8 миллиард манет пӧлысь бадӟым люкетсэ висъяно луоз бюджет удысын ужасьёслы уждун тыронлы. Оглюкетэз кошкоз на нылпи садъёсты выльдонлы, спортзалъёс лэсьтонлы, озьы ик гуртъёсын тужгес сюлмаськытӥсь ужъёсты — чагыр эстӥськон пыртонэз, ву кысконэз, улон интыос пуктонэз — быдэстонлы.
Депутатъёс валало: туэ йылаз-пумаз вуттоно луоз на эшшо одӥг сюлмаськытӥсь ужпумез — лэсьтӥськисьёс азьын 2013-тӥ арысен люкаськись тыриськонъёсты пытсано. Соос ог 2 но ӝыны миллиард манет пала луэмын ни. Бюджетын талы коньдон ӧвӧл. Уг вато: та понна коммерческой банкъёсысь кредит басьтоно луоз. Сотэк лэсьтӥськон удыс куашканы быгатоз. Соин ик депутатъёс огкылэ вуизы: вуоно сессилэн повесткаяз та ужпумез пуктоно, кылдэм югдурысь потон амалъёс утчано.