Кун Кенешлэн Тӧроез Яр но Юкаменск ёросъёсы вуылӥз

Кун Кенешлэн Тӧроез Владимир Невоструев Яр но Юкаменск ёросъёсы вуылӥз. Отын со калыкен пумиськылӥз. Адямиос пӧртэм юанъёсын вазиськылӥзы. Кылсярысь, Яр ёросысь Ворца гуртын улӥсьёс Владимир Невоструевлэсь юрттэт куризы гуртысьтызы клубзэс выльдыны. Кун Кенешлэн Тӧроез клуб юртэз эскериз – отын липетэз воштоно, мукет тупатъянъёс но ортчытоно. Ваньмызлы трос коньдон кулэ луоз. Элькун парламентлэн Тӧроез та ужпум бордын ужалом шуыса оскытӥз.
Со сяна, Владимир Невоструев Ворца школаын ужрадэ пыриськиз. Ваньмызлы кызь укмыс дышетскисьёслы Выль ар кузьымъёс кузьмаз. Сыӵе ик кузьымъёс Юкаменск ёросысь Починка школаысь дышетскисьёс но басьтӥзы. Элькун парламентлэн Тӧроез вераз, вордскем шаерез яратоно шуыса. Озьы ик сӥзиз пиналъёслы умой дышетскыны но вылӥ тодон-валанъёс басьтыны.