Можга ёросысь Пычасын курка вордонъя комплекс усьтӥськоз

Кун Кенешлэн Тӧроез Владимир Невоструев вуылӥз Можга ёросысь Пычас черкогуртысь курка будэтонъя комплексэ. Со быдэсак усьтӥськемын ӧвӧл на ке но, ужамзылэн пайдаез син шорын ни.
Курка будэтон — Удмурт шаер понна выль удыс. Проектэз быдэстон 2013-тӥ арысен кутскиз. Нырысь ик Сарапул ёросысь Уральский черкогуртэ комбикорм поттонъя завод пуктӥзы. Та вие отын ар куспын 40 сюрс тонна комбикорм потто. 2014-тӥ арысен проектлэн кыкетӥ люкетэз быдэсъяськыны кутскиз: курка будэтонъя комплексэз лэсьтыны кутскизы Можга ёросысь Пычасысь парсь вордонъя азьвыл комплекс интые.
— Совето Союз вакытэ та комплекс шаерысьтымы тужгес кужмоез вал, 20 сюрс парсь будэтӥзы, — шуэ Можга ёрослэн йырыз Аркадий Вершинин. — Парсь будэтон комплекс куашказ, 200-лэсь ятыр адямиос ужтэк кылизы. Фермаез токма шорысь куашкатыны жаль потӥз. Кема кенешеммы бере Пычасын курка вордон сярысь огкылэ вуимы. Документ лэсьтон ужъёс ар но ӝынылэсь ятыр кыстӥськизы, со дыр ӵоже куд-ог чидасьтэм кивалтӥсьёс аналскысалзы ни, дыр, нош Игорь Чо вань шуг-секытъёсты чидаз, верам кылыз вылын ӝот-ӝот сылӥз. Выль комплексэ гуртысь 150 пала адямиос нош ик уже интыяськыны быгатозы.
Куркапиосты вайыны чакламын вал Германиысь. Кылем ар пумын нырысетӥ тылобурдоосты Пычасэ вуттӥзы. Кунгож сьӧрысь ваён дуно усемен, кыкетӥ уллёез Ростовысь вайизы, нош март толэзьысен Татарстанысь нуллыны кутскозы. Туннэ нуналлы комплексын 62 сюрс куркапиос будо. Бурдоосты нырысь ик возё яслиын. Татын ужась Елена Ажимова верамъя, 1-2 нуналъем бурдоосты толэзь ӵоже яслиын будэто, отысь омыр мунчоын выллем: 34 градус шуныт возиське. Ӧжытак кыдамзы бере тылобурдоосты мукет корпусъёсы выжто.
- Гидъёсты выльдэм-тупатъям сяна, тылобурдо вандон цех, бадӟым холодильникъёс лэсьтӥськомы, — шуиз та комплекслэн кивалтӥсез Игорь Чо. — Бурдоосты вандыны яра 4-5 толэзьысен. Со дыр ӵоже мумы куркаос 14 килограммозь, айы куркаос 24 килограммозь будыса вутто. Ужмы ваньмыз умой радъяськиз ке, комплексын азьланяз инкубатор но луыны кулэ.
Курка будэтонъя комплексэз сӥё-дано усьтыны чакламын февраль толэзьлэн кыкетӥ ӝыныяз. Ӵапак соку ик ужаны кутскоз тылобурдо вандон цех. Туэ ар куспын 3 сюрс тонна курка сӥль вузаны чаклало ке, вуоно арын та лыдпусэз 2 поллы йылтыны малпало. Курка сӥлез нырысь ик шаерамы вузалозы, Москваысь, Челябинскысь куронъёс вуэмын ке но. Та сӥль капчи сиёнъёс пӧлы пыре, азьланяз сое шаерысьтымы школаосы но нылпи садъёсы вуттон сярысь но малпасько. Нош та вакытэ курка сӥлез килограммзэ шорлыдын 230 манетэн вузалозы.
Курка будэтонъя комплекслы дурбасьтӥз Кун Кенешлэн Тӧроез Владимир Невоструев но. Гурт удысэз азинтонлы бадӟым саклык висъяно, капчиятэм кредит басьтыны юрттоно. Таӵе куронъёс пуктэ Россиысь Гурт хозяйствоя министерство но.