Вань удмуртъёслэн 13-тӥ бадӟым ӧтчамзы усьтӥськиз

Туннэ, 11-тӥ тулыспалэ 2016-тӥ арын Ижкарын, йоскалык театрлэн юртаз, вань удмуртъёслэн 13-тӥ бадӟым ӧтчамзы усьтӥськиз. Удмуртиысь делегатъёс сяна, съездэ лыктӥзы Татарстанысь, Марий Элысь, Башкортостанысь, Киров, Свердловск областьёсысь, Пермь крайысь, Москваысь, Санкт-Петербургысь, Нижневартовскысь, Томскысь удмуртъёс. Ӧтем куноос пӧлын — Удмуртилэн Тӧроез Александр Соловьёв, Кун Кенешлэн Тӧроез Владимир Невоструев но мукетъёс.
Кун Кенешлэн Тӧроез Владимир Невоструев верамъя, таче ӧтчамъёслэн ужазы пыриськыны шуд усе тужгес но быгатӥсь, шаермес кужмогес карыны тыршись, удмурт кылмес, культурамес утьыны, азинтыны сюлмаськись адямиослы. Озьы ик Элькун парламентлэн Тӧроез пусйиз на «Удмурт Кенеш» ассоциацилэсь удмурт калыклы пайдаё луэмзэ: «Туэ "Удмурт Кенешлы" 25 ар тырмоз ни. Та огазеяськон удмурт шаерамы но быдэс фин-угор дуннеын одӥгез тужгес бадӟымез, гажамонэз луиз. Удмурт Кенеш» тыршемен вордӥсько выль тунсыко проектъёс. Шаерамы но солэн палэназ радъясько яркыт, бадӟым ужрадъёс».
Кун Кенешлэн Тӧроез пусйиз, туэ сӥзьыл Кун Думае, ёрос кенешъёсы, гурт поселениосы депутатъёсты быръёнъёсы уногес удмуртъёс мед пыриськозы шуыса. «Асьме калык пӧлын трос йӧно, визьмо, гажано адямиос. Сыӵе азьветлӥсьёслы юрттыны дась «Единая Россия» партия», - вазиськиз Владимир Невоструев.
Элькун парламентлэн Тӧроез бадӟым кенеше люкаськем делегатъёслы сӥзиз ог-огзэс гажаса но валаса ужаны. «Элькунамы трос пӧртэм выжыысь калыкъёс эшъяськыса уло. Ог-огдэ гажан - со бадӟым шуд», шуиз Владимир Невоструев.
Ӧтчам кык нунал ӵоже мыноз. Удмуртъёс азьын сылӥсь лэчыт ужпумъёсты эскерем сяна, «Удмурт Кенеш» огазеяськонлы выль тӧро быръемын луоз на.