Удмуртиысь дано кунмуртлы Александр Фоминовлы – 75 арес

9-тӥ мартэ Кун Кенешын сӥлы каризы Удмуртиысь дано гражданинэз Александр Фоминовез. Солы та нуналъёсы тырмиз 75 арес. Александр Михайлович Рязань улосвылын вордӥськем но будэм воргорон, асьме шаермы понна туж трос лэсьтӥз. Кылсярысь, со партилэн Воткинскысь райкомезлэн нырысетӥ секретарез дыръя зол пушйыны ӧдъяз район. Кивалтон вакытаз ӝутӥськизы нылпи садъёс, больницаос, школаос, соос туннэ ке но йыг-йыг сыло. Александр Михайлович Удмуртиысь Профсоюзъёслэн кенешенызы кивалтӥз. Удмуртиез азинтон понна трос кужымзэ понӥз Верховной Советын, отӥяз Кун Кенешын депутат луыса ужан аръёсаз. Берло кивалтӥз Удмуртиысь Общественной палатаен.
Юбилярез ӟечкыланы люкаськизы вылӥ кивалтӥсьёс, ӵош ужам юлтошъёсыз, тодмоосыз. Шунытэсь кылъёссэ вератэк ӧз кельты Кун Кенешлэн Тӧроез Владимир Невоструев но. Со шуиз:
— Та дано адямиен ӵош ужаны мыным но кылдӥз. Егитэныз но, арлыдоеныз но огкыл шедьтыны быгатэмезлы, югдурысь потон амалъёсты утчамезлы, визьмызлы паймемысь уг дугдӥськы.
«Удмурт Кенеш» огазеяськонлэн азьвыл кивалтӥсез, Удмуртиысь дано гражданин Валентин Тубылов верамъя, удмуртъёс понна но быгатэмезъя Александр Фоминов юрттӥз. Кышноез уго удмурт. Туннэ солэн 6 внукез.
— Кошкыны, ышыны мон уг быгатӥськы — мынам сямам ӧвӧл со. Соин ик шаермес азинтыны тодэм-валаме кулэ луиз ке, туж шумпото но юрттыны тыршо, — шуиз Александр Фоминов.