Пудо сиён дасян но ю-нянь октон ужъёс сярысь кенешизы

3-тӥ куарусёнэ 2015-тӥ арын Владимир Варламов кивалтэмъя Кун Кенешысь агропром огъетъя, музъем кусыпъёсъя но инкуазез утёнъя ялан ужась ӧрилэн кенешонэз ортчиз. Эскерем ужпумъёс пӧлысь валтӥсез - пудо сиён дасян но ю-нянь октон. Кызьы шаерамы мыно сӥзьыл бусы ужъёс? Со сярысь парламентариослы вераз гурт удысъя министр Александр Прохоров. Солэн пусъемезъя, туннэ нуналлы 135 сюрс тонна турын дасямын, кылем арын сярысь 58 сюрслы ӧжытгес.
Министр верамъя, куазь люкетӥз ке но, шаерамы пудоослы сиён ласянь шуг-секытъёс ӧвӧл. Ю-нянь утялтонъя чаклам ужъёс та дыре 51 процентлы быдэстэмын. Пудооослы толъён интыосты дасянъя вань хозяйствоосын ужъёс кутсемын ни. Александр Прохоров верамъя, та ласянь вань чакланъёс быдэстэмын луозы.
Депутатъёс нимысьтыз саклык висъязы пудо сиёнлэсь ӟечлыксэс эскерон пумысен. «Асьмеос ум ке тодӥське, кӧня сиён эскеремын, соослэсь ӟечлыксэ валаны ум быгатэ», - пусйиз агропром огъетъя, музъем кусыпъёсъя но инкуазез утёнъя ялан ужась ӧрилэн кивалтӥсез Владимир Варламов. Со та ужлы бадӟымгес саклык висъяны куриз.