«Единая Россия» партилэн Ижысь общественной штабаз ортчиз «Новая школа» проектлы сӥзем кенешон

«Единая Россия» партилэн Ижысь общественной штабаз ортчем «Новая школа» проектлы сӥзем кенешонэ пыриськизы Кун Кенешысь депутатъёс, Дышетонъя на наукая министерствоысь специалистъёс, элькунысьтымы Общественной палаталэн ёзчиосыз, школаослэн директоръёссы но «Новая школа» проектэз улосамы быдэстон понна кыл кутӥсьёс. Бадӟым саклык висъямын вал школаосты тупатъянлы. Люкаськемъёс ӵектӥзы: соосты тупатъяку, терроризмлэсь утиськонэз но радъяно.
Кызьы пусйиз дышетонъя но наукая министр Светлана Болотникова, школаосын кышкытлыклэсь утиськон ужъёслы 1 миллиард 900 манет висъямын. Талы элькун бюджетысь уксё висъяны чакламын 2025-тӥ арозь. Коньдонлэн бадӟым люкетэз чакламын школаос но охраная предприятиос куспын огкылъёс тупатонлы. Кылемез — кышкытлыклэсь утиськонъя оборудованиез радъянлы.
«Школаосты кышкытлыклэсь утён ужъёсты пыртоно соосты выльдонъя программае. Лэсьтӥськон-тупатъян ужъёс мыныку ик, радъямын луоз кулэ луись оборудование. Та пумысен федерал кивалтӥсьёслы вазиськон келямы ни «Новая школа» проект улсын», - пусйиз Кун Кенешлэн Тӧроезлэн воштӥсез, «Новая школа» проектлэн Удмуртиысь координаторез Татьяна Ишматова.
Ижысь 86 номеро гуманитарно-юридической лицейлэн директорез Надежда Заварзина пусъемъя, лыдэ басьтоно: школаосты утёнэ пыриськыны мед быгатозы оскымон, ужзэс ӟеч быдэсъясь охраная предприятиос. Кенешонын озьы ик саклык висъямын вал «Модернизация школьных систем образования» программалы. Со улсын выльдӥське школаысь ваньбур, учебникъёс, тодон-валанзэс будэтыны быгато дышетӥсьёс но. Дышетонъя но наукая министр Светлана Болотникова пусъемъя, та вакытэ кенешон мынэ школьникъёслэн анай-атайёсынызы. Соослэсь куронъёссэс, ӵектонъёссэс кутӥськомы, шуиз со.