Удмуртилэн 2017-тӥ арлы коньдэтэзлэн ӵектосэзъя депутат но калык кылзонъёс ортчозы

Удмуртилэн 2017-тӥ арлы коньдэтэзлэн ӵектосэзъя депутат но калык кылзонъёс Ижкарын ортчозы. Элькунлэн коньдон ужпумъёсъя валтӥсь ужкагазэзъя ӵектонъёссэс вераны быгатозы вань мылкыд карисьёс.
«Удмурт Элькунлэсь мер но экономиказэ 2017-тӥ арын азинтон но 2018-тӥ но 2019-тӥ аръёслы чакланъёс но Удмурт Элькунлэн 2017-тӥ арлы коньдэтэз но 2018-тӥ но 2019-тӥ аръёсы чакланъёс сярысь» депутат кылзонъёс ортчозы 25-тӥ коньывуонэ 14 часын Кун Кенешлэн юртаз.
Отчы ӧтемын Удмуртилэн Кун Кенешысьтыз депутатъёс, элькун кивалтэтлэн ёзчиосыз, каръёслэн но ёросъёслэн тӧрооссы, муниципал ёросъёслэн но кар округъёслэн быръем ёзэсъёссылэн тӧрооссы но коньдэтъя ялан ужась ӧриослэн кивалтӥсьёссы, парламентэ шедьымтэ партиослэн, мер огазеяськонъёслэн, иворъёсты вӧлмытӥсь ёзэсъёслэн ыстэм муртъёссы.
Таӵе калык кылзонъёс таяз арын нырысьсэ ортчозы. Очной амалэн — 1-тӥ шуркынмонэ 10 часын Удмуртиысь парламентлэн кенешон залаз, заочной амалэн — 20-тӥысен 29-тӥ коньывуонозь. Коньдэт сярысь катӵектосъя ватсанъёсты но ӵектонъёсты электрон амалэн budjet@gossovet.udm.ru адресъя лэзёно яке кагаз вылын: Ижкар, Октябрьлы 50 ар нимо площадь, 15, 411 номеро кабинет.