Удмуртилэн коньдэтэз 5 миллиард 400 миллион манетлы будоз

Удмуртилэн коньдэтэзлэн табыш но уже кутоно люкетъёсыз 2016-тӥ арын 5 миллиард 400 миллион манетлы будыны быгатоз. Сыӵе тупатонъёс ӵектэ элькунысь коньдон ужпумъёсъя министерство. Удысэтлэн ыстэм муртъёсыз 12-тӥ куарусёнэ соосын тодматӥзы Кун Кенешысь коньдэтъя, вытъёсъя но коньдон ужпумъёсъя ялан ужась ӧрилэн кенешоназ.
«Ватсан нырысь ик огазеяськонъёслэн табышсылэсь вытъёс чотын. Та дыре со умой мынэ», — пусйиз улосвылысь коньдон ужпумъёсъя министр Станислав Евдокимов.
Озьыен, кӧня ке ӧръёслы но министерствоослы ватсаса коньдон висъялозы. 2 миллиард 810 миллион манет чаклалозы коньдэт удысын ужасьёслы уждун тырыны, 740 миллион манет муниципалитетъёслэн коньдэтъёссылы (со мыноз ваньбурет понна вытъёсты тырыны но пӧртэмлыкез ӵошатыны), 473 миллион манет сётозы кун пунэмез тырыны.
Мерлык удысын 29 миллион манет мыноз трос нылпиё семьяослы юрттыны но 37 миллион манет котыр — куинетӥез но солэсь тросэтӥез нылпи вордскыку кулэяськись семьяослы толэзьлы быдэ тыронъёслы.
Дыкужымез шыръян программаез быдэсъян понна 58 миллион манет басьтоз дыкужымъя, жилищно-коммунальной возёсъя но тарифъёсты кун ласянь радъянъя министерстволы. 6 миллион 800 сюрс манет — промышленностья но вузкаронъя министерстволы (бадӟым люкетсэ кутозы газ вылын ужась транспорт басьтыны).
Шӧдскымон ватсэт луоз дышетон удыслы: 21 миллион манет школаын сюдон понна, 52 миллион манет анай-атайёслы компенсаци тырыны но 150 миллион манет «Столичный» микрорайонысь выль школалы тӥрлык басьтыны.
3 миллион манет чаклалозы Росси но калыккуспо ӵошатсконъёсын вормисьёслы стипендиос тырыны, 67 миллион манет — спортъя клубъёслы.
«Коньдон ужпумъёсъя министерство азе эшшо лэчыт ужпумъёс пуктэмын вал. Коньдэтэз быдэстон улсын сэрттоно-пертчоно луоз, дыр. Коньывуонэ, оло, шедьтыны быгатомы туннэ нуналлы кылдэм но 2015-тӥ ар понна пунэмъёсты тырон понна коньдон — асьме лэсьтӥськисьёслы, гурт возёслы, транспортникъёслы. Оскиськомы, ар пумозь бадӟым люкетсэ ворсаломы», — вераз Кун Кенешысь коньдэтъя, вытъёсъя но коньдон ужпумъёсъя ялан ужась ӧрилэн кивалтӥсез Софья Широбокова.
Выль ӵектосъя берыктонтэм вылысь вуись коньдонлэн быдӟалаез 1 миллиард 184 миллион манетлы йылоз. Тросэз со сюрес возёсэ мыноз.
Тупатонъёсты кутӥзы ке, табыш люкетэз 29 миллиард 300 миллион манетысь 64 миллиард 800 миллион манетозь вуоз, уже кутоно люкетэз — 63 миллиард 100 миллион манетысь 69 миллиард 100 миллион манетозь. Тырмисьтэм люкетэз воштӥськытэк кылёз — 4 миллиард 300 миллион манет.