Кун Кенешысь депутатъёс элькунэз Россилэн нечернозёмной зонаяз пыртыны ӵекто

Удмуртилэн Кун Кенешысьтыз депутатъёс элькунэз Россилэн нечернозёмной зонаяз пыртыны ӵекто. Со гурт возёсэз азинтон понна федерациысь тросгес субсидиос басьтыны луонлык сётоз. 31-тӥ гудырикошконэ журналистъёслы со сярысь вераз парламентысь агропром огъетъя, музъем кусыпъёсъя, инкуазь узырлыкез кутонъя но инкуазез утёнъя ялан ужась ӧрилэн кивалтӥсез Владимир Варламов.
Кун Кенешысь ялан ужась ӧрилэн кенешоназ Федераци Советлэсь «Удмурт Элькунлэсь мер но экономика удысъёссэ азинтыны кун ласянь юрттэт сярысь» пуктэтсэ быдэстонэн герӟаськем ужпумъёсты но эскеризы.
«Тросэзлэсь культураослэсь, со пӧлын пудо сиёнлы мынӥсьёсызлэсь, удалтонлыксэс будэтон понна милем мелиорациен выроно — куасьтон но мускытатон — со «1 миллион тонна йӧл» элькун программаез быдэстон понна кулэ. Та ӵектос федерал юрттэтъя программае пыриз ни. Та ласянь юрттэт туннэ одӥг: ивестици ӵектосъёсты быдэстон улсын ми выль гидъёс пуктон дунлэсь 20 процентсэ субсидиосын басьтыны быгатӥськомы» — вераз Владимир Варламов.
Солэн кылъёсызъя, Удмуртиысь гурт возёсъя но сиён-юонъя министерство инвесторъёсты чырмытгес утчаны но соослы ӵектосъёсъя ужкагазъёсты дасянын юрттыны кулэ. Со нимысьтыз федерал программае пырыны но ватсаса коньдон басьтыны луонлык сётоз, озьы ужаны быгато ни элькунысь промышленной предприятиосын.
«Элькунамы инвесторъёс вань. Соос пудо уллёез будэтон бордын ужало. Кылсярысь, Вотка ёросысь «Мир» огазеяськонысь Собинъёс 1 сюрс йыр пудолы огъет пуктӥзы, 400 интылы выль гид пукто на. Тодӥсько, Кез ёросын 200 йырлы выль огъетэз туэ вуттыны кулэ. Элькунысь мукет ёросъёсын но адӟем карымон ужасьёс вань», — пусйиз Варламов.
Солэн верамезъя, йӧл поттонлэсь быдӟалазэ будэтонын валтӥсь амалъёс — скалъёслэсь продуктивностьсэс будэтон но соослэсь лыдзэс йылтон. 2016-тӥ арын Удмуртиын 743 сюрс тонна йӧл кыскыны кулэ, 2017-тӥ арын — 819 сюрс тонна, 2018-тӥ арын — 899 сюрс тонна, 2019-тӥын — 965 сюрс тонна, 2020-тӥын — 1 миллион 18 сюрс тонна.
Элькун кивалтэтэн юнматэм ужанрадлыкъя, гидъёс пуктыны но ӟеч выжыысь пудо басьтыны 13 миллиард манетлэсь трос коньдон кулэ луоз.