Уже кутӥськисьтэм гурт возёс музъемъёсты эскерозы Удмуртиысь вань ёросъёсын

Уже кутӥськисьтэм гурт возёс музъемъёсты эскерозы Удмуртиысь вань ёросъёсын. Сыӵе пуктэт кутэмын вал нимаз каткылдытӥсь актъёсы воштонъёс пыртӥсь федерал кат кужымаз пыремен валче. Вераськон мынэ гурт возёс музъемъёсты чакламтэ ужъёсы кутэм яке катрадлыкез тӥяса кутэм понна соосты талан сярысь.
Кун Кенешлэн Тӧроез Владимир Невоструев верамъя, выль кат аналтэм гурт возёс музъемъёсты ӟечгес уже кутыны луонлык сётоз. Парламентлэн спикерез ивортэмъя, гурт возёс музъемъёсты кутонэз эскерон элькунысь вань ёросъёсын ортчоз.
«Музъемъёсты кутонэз радъяны кулэ. Вань асьмелэн частникъёс киын сюрсъёсын гектаръёс, номыр уг лэсьтӥськы, отын жаг будэ. Сыӵе музъемъёсты талаломы», — вераз Владимир Невоструев.
Катэз быдэсъян вылысь федерациын но улосвылъёсын чаклась группаос кылдытэмын ни, соос эсэплыко актъёсты но соосты кутэм катъя тупатэмез эскеро, озьы ик уже кутӥськисьтэм музъемъёслэсь быдӟалазэс пусъё.
Улосвыл ӧриослэн ужпумзы — дасяны ӵектонъёс, кыӵе участокъёс гурт возёс музъемъёс пӧлы пыртэмын луыны быгато, озьы ик кӧня процентсэ музъемъёсты кузёос катэз юнматэм бере уже кутӥзы. Удмуртиын чаклась улосвыл группаен кивалтэ элькун парламентысь агропром огъетъя, музъем кусыпъёсъя, музъем узырлыкъёсты кутонъя но инкуазез утёнъя ялан ужась ӧрилэн кивалтӥсез Владимир Варламов.
Ужась группа вань муниципал кылдытэтъёсы уже кутӥськисьтэм гурт возёс музъемъёслэн быдӟалазы, интыяськемзы но кузёоссы сярысь куронъёс лэзёз. Музъем участокъёслы характеристика басьтон но соосты азьланяз кутон сярысь пуктэт юнматон понна, люкам ивортодэтэз Росреестрлэн но Россельхознадзорлэн элькунъя ӧнерчиосыз эскерозы. Эскеронъёслы йылпумъянъёс гурт возёс музъемъёс сярысь катэз быдэсъян пумысен докладэ пырозы, сое Россилэн азьмуртэзлы сётозы.