«Кигбаевский бекон» предприятилэсь выль гидъёссэ усьтӥзы

11-тӥ гудырикошконэ 2016-тӥ арын «Кигбаевский бекон» предприятилэсь вить выль гидъёссэ усьтӥзы. Ужрадэ пыриськизы Удмуртилэн Тӧроез Александр Соловьёв, Кун Кенешысь агропром огъетъя, музъем кусыпъёсъя но инкуазез утёнъя ялан ужась ӧрилэн кивалтӥсез Владимир Варламов, предприятиын ужасьёс.
8 сюрс 600 квадрат метр быдӟа интыосты одӥг арскын пуктӥзы. «КОМОС ГРУПП» холдинг, отчы пыре парсь вордон огъет, ужъёслы 312 миллион манет висъяз.
Холдинглэн кивалтӥсез, Кун Кенешлэн депутатэз Андрей Шутов верамъя, элькун ласянь юрттэттэк та выллем ӵектосъёс но инвестициос ӧй луысалзы.
Вить гидъёс пӧлысь кыказ мумы парсьёсты вордозы (250 но 225 интылы), одӥгаз пичиоссэ будэтозы (4 сюрс 600 йырлы) но кыказ куайытозы (2 но 2 сюрс 500 йырлы). Ваньмыз туала техникаез кутӥзы: парсьёсты сюдыны автоматика сӧзнэт, омырез чаклась компьютер сӧзнэт. Оператор пудоез утялтэ но техникаен ужа. Чакланъёсъя, ужпӧр 30 процентлы будоз. Парсьёсты будэтон дыр 181 нуналысен 173 нуналозь кулэсмоз, араз 10 сюрс 200 тонна сӥль поттозы.
Та дыре предприятиын пудо выжыез умоятон бордын выро, 45 миллион манет сылӥсь ӵектосэз улонэ пыӵато — датской но канадской выжыысь парсьёс басьтэмын.