Выль школа пуктыны малпало Вавож ёросысь Кионгуртын
05.08.2016
4-тӥ гудырикошконэ 2016-тӥ арын Вавож ёросэ вуылӥзы Элькунлэн Тӧроез Александр Соловьёв но Кун Кенешлэн кивалтӥсез Владимир Невоструев. Соос гурт калыкен пумиськизы, адямиосты сюлмаськытӥсь юанъёслы валэктонъёс сётъязы. Озьы ик, вуылӥзы Кионгуртэ школалэсь юртсэ учкыны. Александр Соловьёв ивортӥз, 2018-тӥ арын та интые выль школа пуктонэз кутскыны малпало. Торо верамъя, школа дышетсконниосты выльдонъя «Школа-2025» кун программалэн нырысь чаклам радлыказ пыртэмын. Выль юрт 180 интылы чакламын луоз.
«Милям чакламмыя, со программа улсын Удмуртиын 30 выль школаос кылдозы. Карын но гуртъёсын. Эшшо 16 школаос выльдэмын луозы. Ужпум — 2025-тӥ арысен асьме дышетскисьёс, быдэс кунысь пиналъёс сямен ик, нырысетӥ сменаын гинэ мед дышетскозы», — вераз улосвыллэн тӧроез Александр Соловьёв.
Али Кионгуртысь 120 пала пиналъёс 1970-тӥ арын пуктэм юртын дышетско. Эшшо 47 нылпиос лулчеберетъя юртын дышетско. Солэн юртэз озьы ик вуж ни. 2014-тӥ арын школалэсь юртсэ эскеризы но сое сэрттыны но выльзэ пуктыны ӵектӥзы.