Омыр десант войскоослэн нуналазы Ижкарын Ялан ӝуась тыл доры сяськаос понӥзы

Ижкарын Ожгар но уж данлыкъя монумент дорын Омыр десант войскоослэн кылдэмзы дырысен 86 ар тырмонлы сӥзем митинг ортчиз. Ужрад кутскиз знамяез поттонэн.
Сяськаос поныны но быремъёсты буре вайыны 2-тӥ гудырикошконэ люкаськизы Омыр десант войскоосысь ветеранъёс но службазэс отын ортчемъёс, службазэс нуыкузы бырем ожгарчиослэн семьяоссы, мерлыко огазеяськонъёслэн ыстэм муртъёссы, карын улӥсьёс но куноос. Ужрадэ озьы ик пыриськизы Удмуртилэн тӧроез Александр Соловьёв, Кун Кенешлэн тӧроез Владимир Невоструев, Ижкарлэн тӧроез Юрий Тюрин но «Союз десантников» улосвылкуспо огазеяськонлэн улосвыл ёзэтэзлэн кивалтӥсез Александр Ткаченко.
«Мон котькуддылы сӥзисько улонэтӥ сэзь мыныны. Тӥледын артэ котьку мед луозы оскымон эшъёсты, мед луоз юн семьяды. Оскисько, Россия но калык котьку но тӥ вылэ оскиськыны быгатозы, нош егитъёсмы тӥлесьтыд адӟем карозы. Сюлмысьтым сӥзисько юн тазалык, шудбур, тупаса улон. Праздникен!», — вазиськиз элькунлэн тӧроез.
Десантникъёслэн кенешсылэн кивалтӥсез Александр Ткаченко люкаськемъёсты праздникен ӟечкылаз, йыр вадьсазы сайкыт инбам но музъем вылэ лякытэн пуксён сӥзиз.
Собере митинге вуэмъёс Ялан ӝуась тыл доры сяськаос понӥзы, бырем ожгар эшъёссэс буре ваизы.
Александр Ткаченколэн верамезъя, десантникъёслэн огазеяськонзы ожгар клубъёсын но секыт быдэ вуымтэосын, егитъёсын но пинал лётчикъёслэн школаенызы уж нуэ. Кылсярысь, 2016-тӥ арын Ижкарысь 5 номеро школаын десант ӧръя кадет класс усьтыны чакламын.
Митинг йылпумъяськем бере, люкаськем калык интыосысь ожъёсын быремъёслы синпелет доры мынӥзы, отысен — «Пыраклы Россиен» монумент доры.