Алнаш ёросын фермеръёслэсь нуналзэс ортчытӥзы

27-тӥ пӧсьтолэзе Алнаш ёросын Россиысь фермеръёслэн нуналзылы сӥзем праздник ортчиз. Отчы Удмуртилэн Тӧроез Александр Соловьёв но Кун Кенешлэн кивалтӥсез Владимир Невоструев пыриськизы.
Ужрад кутскон азьын куноос Алнаш ёросысь «Молодая гвардия» возёслэн ӟег бусыяз вуылӥзы но отын ю-нянез утялтӥсь выль техникаен тодматскизы. Асан гуртын пудо сиён дасянын туала тӥрлыкез возьматӥзы, со тысез паньгатэ но консервировать каре, собере плёнкае бинялтэ.
Россиысь крестьян (фермер) возёсъёслэн, кооперативъёслэн ассоциацизы (АККОР) фермеръёслэсь нуналзэс юнматӥз 2006-тӥ арын. Праздниклы сӥзем ужрадэз Удмуртиысь фермеръёслэн ужамзы сярысь ивортонэн кутскиз Кун Кенешысь депутат, элькунысь крестьян (фермер) возёсъёслэн, кооперативъёслэн но нимаз юртъерен ужасьёслэн огазеяськонзылэн кивалтӥсез Михаил Лебедев.
Туннэ Удмуртиын 1 сюрс 398 крестьян (фермер) возёсъёс пусъемын, пӧлазы ик нимаз ужбергатӥсьёс. Соос борды юнматэмын 133 сюрс 800 гектар музъемъёс — элькунысь вань кизёно музъемъёс пӧлысь 12,8 процентэз. 2016-тӥ арын фермеръёс кизёно муоссэс 10 сюрс гектарлэсь ятырлы будэтӥзы — 2015-тӥ арен ӵошатыса, 8 процентлы. Крестьян (фермер) возёсъёс сӥль, йӧл, ю-тысь, ыжгон, картофка но бакча сиёнъёс потто. Улосвылысь гурт удысын поттэм ваньбурлэн со 5–6 процентэз луэ. 2015-тӥ арын фермеръёс 13 процентсэ ю-тысез, 17 процентсэ картофкаез, 6 процентсэ бакча сиёнъёсты будэтӥзы. 1 сюрс 700 тонна сӥль, 34 сюрс 500 тонна йӧл, 11 тонна ыжгон, 1 миллион 500 курегпуз поттӥзы.
2016-тӥ арын куать толэзь ӵоже фермеръёс 16 сюрс 600 тонна йӧл кыскизы, 400 тонна сӥль, 700 сюрс курегпуз поттӥзы. 2016-тӥ арысь 1-тӥ инвожолы крестьян (фермер) возёсъёсын 17 сюрс 558 йыр сюро таза пудо лыдъяське, со пӧлын 7 сюрс 940 скалъёс.
Гурт возёсэз азинтонъя кун программа улсын 2015-тӥ арысен фермерствоез но покчи ужбергатонэз азинтонлы юрттэт сётӥське. Ортчем дыр ӵоже программае пыриськизы 165 фермеръёс, со пӧлысь 131-ез али ужаны кутскисьёс. Оглом 302 миллион манет тыр грнатъёс сётэмын. Со пӧлысь 146 миллион манетэз кутскись фермеръёслы. Соос 341 огмет техника басьтӥзы, озьы ик йӧл поттон вылысь 221 йыр сюро таза пудо, сӥль поттон вылысь 593 йыр сюро таза пудо, 1 сюрс 151 йыр ыжъёс но 19 йыр парсьёс басьтӥзы.
Семьяен пудо вордӥсьёслы сётэм грантъёс (155 миллион манетлэсь ятыр) 500 йыр пудолы 5 гидъёс пуктыны; 2 сюрс 897 йырлы 21 гидъёсты выльдыны; йӧл кыскон но солэсь вузъёс лэсьтон понна 46 огмет тӥрлык басьтыны; йӧл поттон вылысь 1 сюрс 153 йыр пудо но сӥль поттыны 31 йыр пудо басьтыны луонлык сётӥз. Озьы ик 64 огмет техника басьтэмын: 15 тракторъёс, 4 огмет думиськись тӥрлык, 45 огмет кожаз ветлӥсь техника.
Празднике люкаськемъёслы вазиськиз Александр Соловьёв. Солэн верамезъя, кужмо кузёос но возёсъес асьмелэн ваньмаз ёросъёсын вань. Удмуртилэн Тӧроез пусйиз, юрттэт луоз кутскисьёсызлы но, трос аръёс ӵоже ужась фермеръёслы но.
Туннэ ик устоосызлы фермеръёслы кун но удыс данъетъёс сётӥзы. Мылкыдэз ӝутӥзы Алнаш ёросысь творчествоя коллективъёс.
Фермерлэсь нуналзэ пусъён азьланьтӥськиз Алнаш черкогуртлы матысь возь вылын. Куноосты сям-нерге ӝукен, перепечен утялтӥзы. Отын ик вал вылын ворттылонъёс ортчизы, озьы ик гурт возёс техникаез возьматӥзы.