Театр утча ним

Ижысь Короленко нимо вуж театрез тупатъян мыло-кыдо мынэ. Лэсьтӥськисьёс азе баӟдым ужпум пуктэмын: быдэсак воштоно укноосты, ву гумыосты, кӧсатоно гулбечсэ, тупатоно пырон ӧссэ, выльдоно липетсэ. Та нуналъёсы Удмуртилэн Тӧроез Александр Соловьёв Кун Кенешлэн кивалтӥсеныз Владимир Невоструевен, министерствоысь но Иж город администрациысь кивалтӥсьёсын ӵош югдурез эскерыны вуылӥзы.
Театр котырын трос вуж объектъёс: мастерской, гараж но мукет куштэм серегъёс. Кенерез гинэ но чебер ӧвӧл ни. Ӵапак та объектъёс котыртӥ кема ветлӥзы кивалтӥсьёс. Выльдэм юртлэсь туссэ медаз сапталэ шуыса, кенешизы тупатыны луоно объектъёсты юнматыны, кулэтэмзэ кесяны, интыязы туала гаражъёс ӝутыны. Со сяна, куакъёсты ӵышкыны косэмын. Александр Соловьёв верамъя, театр сентябрь кутсконын вуттэмын луыны кулэ.
Культурая но туризмъя министр Владимир Соловьёв шуиз, театр сётэмын луоз кырӟанъя но эктонъя «Айкай» кун театрлы. Со сяна, инты висъялозы мукет фольклор коллективъёслы но. Тытын ик ужалоз удмурт кафе. Али театрлы ним утчало.