Версия для слабовидящих
Элькунысь вылӥ дышетсконниосысь 20 усто студентъёс Кун Кенешлэсь нимысьтыз стипендизэ басьтозы

Элькунысь вылӥ дышетсконниосысь 20 усто студентъёс Кун Кенешлэсь нимысьтыз стипендизэ басьтозы

20.10.2021
Кун Кенешлэсь нимысьтыз стипендизэ юнматонъя конкурс ӧрилэн йылпумъянъёсын кенешонэз ортчиз. Видеконференция амалэн сое нуиз наукая, дышетонъя, культурая, туризмъя но йӧскалык политикая ялан ужась комиссилэн кивалтӥсез Татьяна Ишматова.
Ӧрилэн ёзчиосыз пыр-поч эскеризы вылӥ дышетсконниосын ӵектэм котькуд кандидатураез. Нимысьтыз саклык висъяськиз студентъёслэн дышетсконын азинсконъёссылы, мерлыко уже пыриськемзылы, тодосэн но творчествоен тунсыкъяськемзылы, пӧртэм конкурсъёсын но конференциосын вормонъёссылы.
Кенешонын 20 тужгес но усто кандидатъёс быръемын. Вормисьёс пӧлын – тазалыкез утён, гурт возёс, энергетика, экология удысъёсын тодос эскеронъёслэн авторъёссы, поисковой движение пыриськисьёс, асьсэлэсь дышетсконнизэс быдэс кунлы тодмо карем кырӟасьёс но эктӥсьёс, туризм но шаерез тодон удысъёсын проектъёслэн но творческой ужрадъёслэн кичӧлтӥсьёссы.
Кун Кенешлэн Тӧроезлэн Владимир Невоструевлэн ӵектэмезъя юнматэм премиос туэ тямысэтӥ ползэ сётӥськозы ини. Егитъёс соосты Кун Кенешлэн сессиез дыръя басьтозы.
Тодады вайытом, Кун Кенешлэн нимысьтыз стипендиосыныз арлы быдэ пусйисько дышетсконын, эскерон ужъёсын висъяськем но мерлыко ужъёсы мыло-кыдо пыриськись студентъёс. Лауреат луыны быгато Удмуртиын интыяськем кун, муниципал но частной вылӥ дышетсконниосын тодон-валан басьтӥсьёс. Стипендилэн быдӟалаез 11 500 манет.

Возврат к списку