Версия для слабовидящих
Кун Кенешын элькунын кылдэм эпидемиологи югдурен герӟаськем лэчыт ужпумъёсты эскеризы

Кун Кенешын элькунын кылдэм эпидемиологи югдурен герӟаськем лэчыт ужпумъёсты эскеризы

30.09.2021
Кун Кенешлэн Президиумезлэн ёзчиосыз 29 куарусёнэ улосвылысь эпидемиологи югдурен, коронавируслэсь вӧлмонзэ алонэн но калыклэсь тазалыксэ утёнэн герӟаськем лэчыт ужпумъёсты эскеризы. Дистант амалэн кенешонэз ортчытӥз элькун парламентлэн спикерез Владимир Невоструев.
Кызьы вераз элькунысь тазалыкез утёнъя министрлэн воштӥсез Марина Петренко, элькунын югдур, быдэс Россиын сямен ик, капчи ӧвӧл. 2020 арын южтолэзьысен Удмуртиын коронавирусэн 52 960 мурт висиз ини. 42 сюрслэсь ятыр адями йӧнатӥськиз. Та дыре шаерысьтымы эмъяськонниосын коронавирусэн черламъёслы 3 189 инты дасямын. Югдурез лыдэ басьтыса, койкаослэсь лыдзэс йылэтыны вераськемын. 1 коньывуонысен ватсаса 90 инты усьтэмын луоз ожмаськонъёсысь ветеранъёслэн элькун госпиталязы, 150 инты – Ижкарысь 1-тӥ клинической больницаын.
Марина Петренколэн верамезъя, коронавирусэн черлам но хронической висёнъёсын курадӟись 60 ареслэсь арлыдо вань адямиосты соку ик эмъяськонние интыяло. Йӧнатон амалъёсты но соослэсь пайдалыксэс нуналлы быдэ эскеро. Со понна Ижкарысь кун амакадемиысь профессоръёсты уже кыско. Со сяна, кенешонъёс нуисько тазалыкез утёнъя элькун но федерал министерствоосысь ӧнерчиосын. Соин ӵош ковид-центръёсын ужась эмчиос понна дышетон радъямын. Уй-нунал ӵоже ужа адямиослэн вазиськонъёссы понна чаклам колл-центр.
Коронавируслэн вӧлмонэныз нюръяськонын бадӟым инты басьтэ вакцинация. Солэсь ӝоглыксэ будэтыны кулэ, пусйиз министрлэн воштӥсез. Туннэ Удмуртиын 45 эмогазеяськонъёсын вакцинацияя 128 пункт усьтэмын. Кун ужъюртъёсын сяна, вакцинация «РЖД-Медицина» огазеяськонын мынэ. Туннэ ужзэ азьланьтэ на Ижкарысь Шор площадьын усьтэм пункт, 1 коньывуонысен со калыклэн тазалыкезъя Центре выжтэмын луоз.
Роспотребназорлэн Удмурт Элькунъя Управлениезлэн кивалтӥсез Наталья Матюшина вераз, берло дыре шаерамы коронавируслэн дельта-штаммез ӵемгес пумиськылэ шуыса. Со 18 муниципал кылдытэтъёсын пусъемын. Тужгес трос учыръёс Ижкарын, Можгалан, Сарапулын, Ува но Дэри ёросъёсын.
Наталья Матюшина пусйиз, висён ӵемгес палаське семья пушкын, калыкез сюдон интыосын но ужан коллективъёсын. Соин валче Роспотребнадзорлэн Управлениез коронавирус инфекцилэн вӧлмонэныз нюръяськонъя улосвыл штабе калыко интыос понна чурытатон ужрадъёсты юнматонъя ӵектонъёссэ сётӥз.
Та ужрадъёслэн кулэлыксы сярысь вераз Кун Кенешлэн Тӧроезлэн Нырысетӥ воштӥсез Надежда Михайлова но. 28 куарусёнэ Улосвыл штаб куд-ог чурытатонъёсты юнматӥз. Озьы 29 куарусёнысен фуд-кортъёслэн ужзы дугдытэмын. Соос ужалозы на вокзалъёсын, аэропортын но автозаправкая станциосын гинэ.
Со сяна, туннэ нуналысен калыкез сюдон интыослэн залъёссы ӝынылы гинэ тырмытӥськыны быгато. Быдэс залэн ужан понна, отчы лыктӥсь котькуд адямилэн вакцинациез ортчем сярысь QR-кодэз яке коронавирусэн черламтэез возьматӥсь ПЦР-эскеронэз луыны кулэ. Спорт но культурая ужрадъёсы ветлон понна таӵе ужкагазъёс кулэ луозы 5 коньывуонысен нимысьтыз косон потытозь. Со сяна, вузкарон центръёсы но калыкез сюдон интыосы пырисьёслэсь одно ик температуразэс эскерыны кулэ.
Надежда Михайловалэн малпамезъя, элькунамы но быдэс кунын паласькись висёнъёсын нюръяськонъя службалэсь сӧзнэтсэ умоятыны кулэ. Пӧртэм черъёс алян учыръёсы со вакчи дыр куспын кулэ ужрадъёсты ортчыны мед быгатоз.
Кун Кенешлэн Тӧроез Владимир Невоструев калык пӧлын валэктон уж нуонлэсь кулэлыксэ пусйиз. Котькуд депутатэз со аслаз округысьтыз бырйисьёсын пумиськылыны, вакцинацилэн пайдалыкез сярысь вераськонъёс ортчытъяны куриз.
Спикер эпидемиологи службаез азинтонъя ӵектон понна дурбасьтӥз. «Коронавирус бере мукет но висёнъёс кылдыны но вӧлмыны быгатозы. Соин ик огъя служба ӝог но пайдалыко луыны кулэ», - пусйиз Владимир Невоструев. Та ужпумез со Приволжск федерал округысь кат кылдытъясь ёзъёслэн Ассоцияциязы ӝутыны дась луэмез сярысь вераз. Кат кылдытъясьёслэн пумиськонзы ортчоз Пензаын коньывуон толэзе.

Возврат к списку