Удмуртиысь Кун Кенешын ожмаськонъёсысь ветеранъёслы но радиаци авариосты утялтӥсьёслы вытъёслы вычетъёсты бадӟыматонъя ӵектон дасямын

Кун Кенешысь ужъя, мерлыко политикая но ветеранъёслэн ужъёссыя ялан ужась комиссилэн кивалтӥсез Алексей Чернов Удмурт Элькунысь Союз «Чернобыль» огазеяськонлэн кивалтӥсеныз Семён Сармакеевен пумиськылӥз. Вераськон мынӥз пӧртэм ожмаськонъёсысь инвалидъёслы но радиаци авариосты но шимучыръёсты утялтонэ пыриськем муртъёслы вытъёслы вычетъёслэсь быдӟалазэс будэтонъя кичӧлтон сярысь. Россиысь Вытъёсъя кодексэ пыртыны сыӵе ӵектон дасяз Кун Кенешысь комиссия.
Али ужась катрадлыкъя, Быдӟым Атыкай ожысь ветеранъёс, СССР-эз, Росси Федерациез утьыкузы яке мукет ожгар ужоскетъёссэс быдэсъякузы сӧсырмыны сюрем но инвалид кылем муртъёс, Чернобыль АЭС-ын, «Маяк» огазеяськонын, «Укрытие» объектын авариослэсь бервылъёссэс утялтонэ пыриськемъёс, ядерной ожтӥрлыкез но радиоактивной суретъёсты эскеронэ, радиоактивной суретъёсты бичан но возён уже пыриськемъёслы толэзьлы быдэ вытъёсъя вычет лэсьтӥське. Солэн быдӟалаез 3 сюрс манет. Удмуртиысь депутатъёс сое 10 сюрс манетозь ӝутыны ӵекто.
Удмуртиысь Союз «Чернобыль» огазеяськонлэн кивалтӥсез Семён Сармакеев кичӧлтонлы умой дунъет сётӥз. Со пусйиз, таӵе ужрад адямиосты кышкытлыкъёслэсь асьсэлэсь тазалыксэс жалятэк утем муртъёслы шӧдскымон юрттэт луоз шуыса.
Кат кутонъя кичӧлтон ялан ужась ӧрилэн кенешоназ эскеремын луоз на. Комиссилэн ёзчиосыз со понна дурбасьтэм бере, Кун Кенешлэн сессиезлэн ужанрадаз пыртыны дэмламын луоз.