Версия для слабовидящих
Надежда Михайлова COVID-19 черлы пумит вакцинацилэн мынэмез сярысь ивортӥз

Надежда Михайлова COVID-19 черлы пумит вакцинацилэн мынэмез сярысь ивортӥз

21.06.2021
Туннэ Удмуртиысь Элькун Тӧро дорын ортчем кенешонын Кун Кенешлэн Тӧроезлэн Нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Надежда Михайлова шаерамы коронавируслы пумит вакцинацилэн мынэмез сярысь ивортон лэсьтӥз.
Вакцинация - черлэсь вӧлмонзэ дугдытон но черламъёслэсь лыдзэс кулэстон тужгес оскымонэз амал, пусйиз со. Удмуртиын сое ортчытон понна луонлыкъёс кылдытэмын. Шаерамы вакцинацияя 63 пункт ужа, со пӧлысь 12-ез интыысь интые ветло. Вакцинопрофилактикае эмчиослэн 252 бригадаоссы кыскемын.
Али улосчиосмы Спутник V, ЭпиВакКорона но КовиВак препаратъёсты басьтыны быгато. Тросэн прививка пуктылыны кутскем дырысен Удмуртие 172 сюрс доза вакцина вуиз ни. Матысь 2 арня ӵоже эшшо 29 сюрс доза возьмало.
Та дырлы Удмуртиын улӥсьёс пӧлысь 17 процентэз ковидлы пумит вакцинациез быдэсак ортчемын. Нош черлэсь вӧлмонзэ дугдытон понна ӧжытсэ 60 процентэз калык утиськемын луыны кулэ. Надежда Михайлова пусйиз, висёнлэсь огъя утет кылдытон понна, вакцинациез эшшо 2 поллы кужмоятоно шуыса.
Нимысьтыз саклык висъяно трос калыкен ужась ӧнерчиослы. Та дырлы эм удысын тыршись 46 процентэз адямиос, дыкужым сётӥсь предприятиосысь 38 процентэз ужасьёс, колледжъёсысь но вузъёсысь 35 процентэз студентъёс, мерлыко удысысь 23 процентэз ӧнерчиос прививка пуктӥзы.
Ужрадэз ӝегатыны быгатэ ивортонъёслэн калык дорозь вуымтэзы. Вакциналэн кулыкез сярысь тодытэк, адями прививка пуктыны уг дырты. Надежда Михайлова эм учреждениосты, уж сётӥсьёсты, дышетсконниосты калык пӧлын валэктон ужез кужмоятыны куриз. Со сяна, улӥсьёслы вакцинаци ортчытон понна капчиесь луонлыкъёс кылдытоно – вакцинаез шутэтскон нуналъёсы но ӝыт уж бере пуктыны мед луоз. Озьы ик ужез предприятиосы но огазеяськонъёсы потаса нуоно. Муниципал кылдытэтъёслэн тӧроссылы кыдёке интыяськем гуртъёсын улӥсьёс пӧлын но вакцинаци орчытон сярысь сюлмаськоно.
Александр Бречалов саклык висъяз эм учреждениосы вакцина люкылонэз чакланлы. Одӥг ёросын но препаратъёс тырмымтэен шугъяськонъёс кылдыны кулэ ӧвӧл. Туннэлы ужпум - уй-нунал ӵоже 5-6 сюрс адямилы прививка пуктыны. Соин валче коронавирус инфекцилэсь вакцинаци ортчытон интыослэсь лыдзэс йылэтыны вераськемын.




Возврат к списку