Эскеремын адямиослы газ пыртыны юрттэт сётон амалъёс

Туннэ Кун Кенешысь экономика политикая, промышленностья но инвестициосъя ялан ужась комиссилэн кивалтӥсез Тимур Ягафаров гуртъёсын газификация ортчытыку адямиослы юрттэт сётон амалъёсты эскеронлы сӥзем кенешон ортчытӥз. Вераськонэ пыриськизы агропром огъетъя, музъем кусыпъёсъя, инкуазез уже кутонъя но сое утёнъя комиссилэн кивалтӥсез Владимир Варламов, «Газпром газораспределение Ижевск» акционер огазеяськонлэн кивалтӥсез Сергей Сивцов, лэсьтӥськонъя, жилищно-коммунальной возёсъя но энергетикая министерствоысь ӧнерчиос.
Тимур Ягафаров вераз, 22 оштолэзе Кун Кенешлэн Президиумез Росси Азьмуртлэн Посланияз чузъяськем ӵектонъёсты быдэсъян сярысь кенешиз шуыса. Одӥгез соос пӧлысь – улон коркаосы газ кысконъя план кылдытон. Владимир Путин адямиосты гумыосты улон интызылэн музъем гожез дорозь кыскем понна тыронлэсь мозмытыны косӥз. Депутатъёс пусйизы, та ужрад чагыр эстӥськон кыскон ужъёсты шӧдскымон капчиятоз шуыса. Соин ӵош ватсаса юрттэт сётон амалъёс кылдытон сярысь кенешизы.
Кенешонын чузъяськем ӵектонъёс пӧлын – чагыр эстӥськонэз корка пыртон понна кулэ луись тӥрлыкез басьтыны капчиятэм кредитъёс висъян, кредитъёс понна процентъёсты кун чотын берыктон. Вераськон мынӥз анай капиталысь уксёез газ пыртыны кутыны луонлык сётон сярысь но.
Та но мукет ӵектон-дэмланъёсъя уж азьланьтӥськоз.