Версия для слабовидящих
Кун Кенешлэн Президиумез газ кысконъя 2018-2022 аръёслы чаклам улосвыл программалэсь быдэсъяськемзэ эскериз

Кун Кенешлэн Президиумез газ кысконъя 2018-2022 аръёслы чаклам улосвыл программалэсь быдэсъяськемзэ эскериз

22.04.2021
Кун Кенешлэн Президиумез газ кысконъя 2018-2022 аръёслы чаклам улосвыл программалэсь быдэсъяськемзэ эскериз
Туннэ Кун Кенешлэн Тӧроез Владимир Невоструев элькун парламентлэн Президиумезлэсь кенешонзэ ортчытӥз. Депутатъёс «Газификация Удмуртской Республики на 2018-2022 годы» программалэсь быдэсъяськемзэ эскеризы. Кызьы вераз элькунысь лэсьтӥськонъя, жилищно-коммунальной возёсъя но энергетикая министр Дмитрий Сурнин, 2018-сен 2020 арозь «Газпром» ПАО Балезино, Дэри, Дебес, Каракулино но Можга ёросъёсын гуртъёсты герӟась 5 газопровод кыскиз. Солэн огъя кузьдалаез – 119,1 иськем. Гуртъёс пушкын та дыр ӵоже 780 иськем выль газ гумыос кыскемын. Ужъёс 23 муниципал огазеяськонъёсысь 76 гуртъёсын мынӥзы.
2020 арын программаез быдэсъяны пӧртэм ӧръёсъя 1225,9 миллион манет висъямын. 2019 арын сярысь со шӧдскымон тросгес, пусйиз Дмитрий Сурнин. Озьы 2018-2020 аръёс ӵоже чагыр эстӥськон 16 сюрс квартираосы но коркаосы пыриз.
2021 арын «Газпром» ПАО Дебес черкогурт - Варни - Тольён – Лесагурт – Турнес газопровод лэсьтӥз. Солэн кузьдалаез – 19,5 иськем.
Удмурт Элькунлэн бюджетэз чотын Варни, Тольён, Лесагурт но Турнес гуртъёс пушкытӥ газ гумыос кыскемын. Соослэн огъя кузьдалазы – 16,6 иськем. Озьы 166 коркаосын улӥсьёслэн чагыр эстӥськон вылэ выжыны луонлыксы кылдӥз.
Туэ «Газпром» Дэри, Игра, Красногорск, Сюмси ёросъёсын гуртъёсты герӟась 180 иськем гумыос кыскыны чакла.
Адресной инвестици программая туэ Якшур-Бодья ёросысь Чур черкогуртын газ гумыос кыскемын, Шаркан ёросысь Мишкино гуртъя проектной ужъёс быдэстэмын луыны кулэ.
Дмитрий Сурнин пусйиз, кылем арын Удмуртилэн Тӧроез Александр Бречалов но «Газпром» огазеяськонлэн кивалтӥсез Алексей Миллер Удмурт Элькунын 2021 но 2025 аръёсы газ кысконъя инвестиционной программаез юнматӥзы. Солы 6,1 млрд манет уксё висъяськыны кулэ. Со пӧлысь 4,3 млрд манетэз - «Газпромлэн» инвестициосыз, 1,8 млрд манетэз – Удмурт Элькунлэн коньдонэз. Программая 12 ёросъёсысь 139 гуртъёсы интыяськем 8,6 сюрс коркаос газ гумыос борды итэмын луозы.
Со сяна, Удмурт Элькун Кивалтэтлэн 2022-2032 аръёслы чаклам газификация улосвыл программаез вань. Соя 18 ёросъёсысь 60 гуртъёсын 264 иськем газ гумыос лэсьтыны кулэ.
Министрлэн верамезъя, туэ ар кутсконлы шаерамы газификацилэн шоро-куспо быдӟалаез 71,1 процент луэ. Каръёсын та лыдпус 82,3 процент, гуртъёсын – 53, 6 процент. 2021 ар ӵоже шаермыя газификациез 73,5 процентозь вуттыны ужпум пуктэмын.
Депутатъёс газ кысконъя ужез огъя умоен лыдъязы но оскемзэс веразы, матысь дырлы пусъем ужпумъёс быдэстэмын луозы шуыса. Гуртъёсы газ пыртон ужез капчиятоз Росси Азьмуртлэн Посланияз чузъяськем ӵектон. Тодады вайытом, 21 оштолэзе Федерал Собранилы вазиськоназ Владимир Путин адямиосты мозмытыны дэмлаз газ гумыез улон интызылэн музъем гожез дорозь кыскем понна тыронлэсь.
Туннэ кенешонын Росси Азьмуртлэсь Посланизэ Удмурт Элькунын быдэсъянъя планлэсь ӵектоссэ но эскеризы.




Возврат к списку