Владимир Невоструев: Интыысь аскивалтон – демократи кунлэн инъетэз

Туннэ, 21 оштолэзе, Россиын интыысь аскивалтонлэн нуналэз пусйиське. Юнматэмын со 2012 арын 10 инвожое.
Интыысь аскивалтон ёзъёсын ужасьёсты но вань калыкез праздникен ӟечкылаз Кун Кенешлэн Тӧроез Владимир Невоструев.
Интыысь аскивалтон адямиослы тужгес но матын, пусйиз со. Соин ик солэн ужезлэн ӟечлыкезлэсь калыклэн мылкыдыз но, азинлыкез но потэ.
«Аскивалтон со – муниципалитетъёсын ужасьёс но депутатъёс гинэ ӧвӧл. Со ваньмыз, кин сюлмаське вордӥськем шаерезлэн туннэ но ӵуказе нуналъёсыз сярысь», - шуэмын Кун Кенешлэн Тӧроезлэн вазиськоназ.
2020 арын, куке Удмуртия но быдэс Россия пумиськизы выль висёнэн, интыысь аскивалтонлэн кужымез уката но ӟеч адӟиськиз. Валче ужаса, шаермы бадӟым ыштонъёслэсь утиськыны, выль черлэсь паськыт вӧлмемзэ дугдытыны, экономиказэ возьыны быгатӥз.
Туэ Удмуртиысь 25 гурт ёросъёсын муниципал округъёс кылдытэмын луозы. Воштӥськонъёс кылдылӥсь юанъёсты ӝоггес сэрттыны-пертчыны, кивалтӥсьёслэсь кылкутонзэс юнматыны, мултэс кагазъёслэсь куштӥськыны юрттозы.
Кун Кенеш азьвыл сямен ик интыысь аскивалтон ёзъёсты кат кылдытъян уже кыскоз. Огъя ужлэн валтӥсь емышез - адямиослэсь улон ӟечлыксэс ӝутон, пусйиз Владимир Невоструев.
Со тау каремзэ вераз удысын тыршисьёслы секыт но кулэ ужез нуэмзы понна.