Удмуртиын Кун Кенешлэн кузьымезлы валэн ӵошатсконъёс ортчозы
28.07.2015
27-29 гудырикошконэ Ижкарын валэн ӵошатсконъёс (конкур амалъя) ортчозы. Сӥземын соос Быдӟым ожын Вормонлы 70 ар тырмонлы. Валтӥсь кузьым луоз Удмурт Элькунысь Кун Кенешлэн кубокез.
Оргкомитетэн кивалтэ элькун парламентлэн Тӧроез Владимир Невоструев. Со сяна ӵошатсконъёсты радъянэ мыло-кыдо пыриське Кун Кенешысь ЛДПР фракцилэн кивалтӥсез Дмитрий Кулишов. Озьы ик радъясь комитетлэн ужаз пырисько пӧртэм министертсвоос но ведомствоос, "Удмуртская" кун конюшня но Ижкарысь валъёсын ӵошатсконъёсъя "АС" клуб.
Валэн ворттылонъя быгатонлыкъёссэс возьматыны ӧтё 2001-2003 но 1997-2000 аръёсы вордӥськем пиналъёсты.
Конкур - со валэн ӵошатсконъя тужгес егитэз амал. Солы алигес гинэ 100 ар тырмиз. Пӧртэм ӝуждалаё баръеръёсты ӝог но чебер ортчыны кулэ. Вормисен лыдъялозы пусъем сюресэс чалягес ортчем но ӧжытгес штрафной балъёс люкам ӵошатскисез.
Пыриськыны мылкыд карисьёс вазиськыны кулэ оргкомитетэ 10-тӥ гудырикошконозь таӵе электрон почтая: koni18@mail.ru.