Кун Кенешлэн кубокез понна валэн ӵошатсконъёсъя оргкомитетлэн ёзчиосыз Ижкар ипподромын кенешон ортчытӥзы

2015 арлэн 12 гудырикошконаз валэн ӵошатсконъёсты радъянъя но ортчытонъя оргкомитет люкаськылӥз Ижкар ипподроме. Кун Кенешлэн Тӧроез Владимир Невоструев кивалтэм улсын эскеризы площадкалэсь дась луэмзэ но пыр-поч вераськизы ӵошатсконъёслэн радлыксы сярысь.
Тодады вайытом, та вожвылъяськонъёс, кудъёсыз сӥземын Быдӟым Вормонлы 70 ар тырмонлы, ортчозы 27 – 29-тӥ гудырикошконэ. Отчы пыриськозы вал спортэн вырисьёс но мукет мылкыд карисьёс, валъёсты яратӥсьёс. Ӵошатсконэ витё нылпиосты но егитъёсты, кудъёсыз вордскемын 2001- 2003 но 1997-2000 аръёсы. Нимысьтыз зачётъёсын ӵошатскыны быгато вань мылкыд карисьёс. Котькуд пыриськись вал вылын пукыса кулэ ортчыны 100, 110 яке 120 см ӝуждалаен 10 могӟет– лыдэ басьтӥське маршрутлэн шуг-секытэз. Вормисе потэ соиз ворттылӥсь, кудӥз чалякгес вуэ финише но уг люка штрафной баллъёс. Вормисьёс утозы кубокъёс, медальёс, дипломъёс но уксё кузьымъёс. Удмуртиысь сяна ӵошатсконъёсы пыриськозы Перм улосысь, Татарстан но Марий Эл элькунъёсысь спортсменъёс. Со сяна ӧтенъёс келямын Башкирие, Киров, но Тюмень улосъёсы но мукет интыосы.
Оргкомитетлэн кивалтӥсезлэн воштӥсез, Кун Кенешлэн депутатэз Дмитрий Кулишов вераз, кызьы азьланьтӥське ӵошатсконъёслы дасяськон.

Кун Кенешлэн Тӧроезлэн Владимир Невоструевлэн верамезъя, таӵе ӵошатсконъёс асьме шаерамы вал спортлы азинскон сётозы: «Вал спорт Удмуртиын азьло дырысен ни вӧлмемын, мон малпасько, азьланьын но со азинскоз. Уно спорт удысъёс асьмелэн рос-прос будэмын ни: куасэн бызьылон, хоккей, биатлон, валэн ӵошатсконъёс но таин медаз быре. Та ужпумез быдэстон понна кулэ дасяны ӵошатскон интыез но, спортсменъёсыз но», - шуиз элькун парламентлэн спикерез.