Владимир Невоструев шаерысьтымы кивалтӥсьёсты валэн ворттылонъя ӵошатсконъёсы ӧтиз

2015-тӥ арлэн 17-тӥ гудырикошконаз, Элькун Тӧролэн администрацияз кенешон ортчыку, элькун парламентлэн кивалтӥсез Владимир Невоструев Кун Кенешлэн Кубокез понна валэн ворттылонъя ӵошатсконъёс сярысь ивортӥз. Та вожвылъяськонъёс, кудъёсыз сӥземын Быдӟым Вормонлы 70 ар тырмонлы, ортчозы 27 – 29-тӥ гудырикошконэ Ижкар ипподромын. Отчы пыриськозы вал спортэн вырисьёс но валъёсты яратӥсьёс. Ӵошатсконэ витё нылпиосты но егитъёсты, кудъёсыз вордскемын 2001-2003 но 1997-2000 аръёсы. Нимысьтыз зачётъёсын ӵошатскыны быгато вань мылкыд карисьёс. Котькуд пыриськись вал вылын кулэ ортчыны 100, 110 яке 120 см ӝуждалаен дас могӟетъёсты – лыдэ басьтӥське маршрутлэн шуг-секытэз. Вормисе потэ соиз ворттылӥсь, кудӥз чалякгес вуэ финише но уг люка штрафной баллъёс. Вормисьёс утозы кубокъёс, медальёс, дипломъёс но уксё кузьымъёс. Удмуртиысь сяна ӵошатсконъёсы пыриськозы Пермь улосысь, Татарстан но Марий Эл элькунъёсысь спортсменъёс. Со сяна ӧтенъёс келямын Башкирие, Киров, но Тюмень улосъёсы но мукет интыосы.
Кун Кенешлэн Тӧроезлэн Владимир Невоструевлэн верамезъя, 28 но 29 гудырикошконэ ипподромын ярмарка радъяськоз. Отын басьтыны луоз нянь, сӥль, йӧл, чорыг но бакча сиён-юонъёсты. Озьы ик, луоз на удмурт нюлэслэн кузьымъёсыз: губиос, лягмульы, йырмульы, эмъюмо турынкуаръёс, чечы, кызьпу веник, удмурт сиён-юонъёс но дышетскисьёслы вузъёс.