Тазалыко улонъя форум ортчиз Ижкарысь Устинов ёросын

2015-тӥ арлэн 18-тӥ гудырикошконаз Ижкарын 93 номеро школаын ортчиз тазалыкез утёнъя Форум. Таӵе ужрад туэ шоркарын кыкетӥ ползэ радъяське ини. Кутскон сётэмын вал 11-тӥ гудырикошконэ, АМУ РКЦ «Русский дом» шутэтскон интыын.
Таяз ужрадэ пыриськизы Кун Кенешлэн Тӧроез Владимир Невоструев, Кун Кенешлэн тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась комиссилэн кивалтӥсез Светлана Кривилёва, Кун Кенешлэн тӧроезлэн нырысетӥ воштӥсез, бюджетъя, вытъёсъя но коньдон ужпумъёсъя ялан ужась комиссилэн кивалтӥсез Софья Широбокова, мерлыко политикая ялан ужась комиссилэн тӧроез Ольга Казанцева но Ижкарысь администрациосысь но министерствоосысь ужасьёс.
Форуме лыктэмъёс эмъясьёсын кенешыны быгатӥзы. Татын ужазы терапевт, кардиолог, онколог, дерматовенеролог, опорно-двигательной аппаратлэн висёнъёсызъя, тазалыко сиськонъя эмчиос. Озьы ик, котькудӥз быгатӥз мерттаны аслэсьтыз вирзӥбетсэ, ӝуждалазэ но секталазэ.
Физкультурая, спортъя но егитъёсын ужан политикая министерство ортчытъяз боксъя, дзюдоя, баскетболъя, стендовой ыбылӥськонъя мастер-класссъёс. Озьы ик адӟытон но радъямын вал.
Ужрадэз усьтыса вань мылкыд карисьёс понна зарядка ортчытӥз Тамара Тихонова - СССР-ысь спортъя дано мастер, куасэн бызьылонъя Олимпи шудонъёслэн 2 полэс чемпионкаез, дуннелэн 4 полэс чемпионкаез, СССР-лэн уно полэс чемпионкаез.
«Тазалыкез номырин но уд басьты, нокыӵе законъёсын уд тупаты. Соин ик чаклалэ тазалыктэс, яратэ ог огдэс, яратэ улонэз…», - люкаськемъёс азьын вераськыкуз пусйиз Кун Кенешлэн Тӧроез Владимир Невоструев.