Ожысь ветеран Кун Кенешлы выль книгазэ кузьмаз

«О прожитом и пережитом» - озьы нимаз аслэсьтыз выль книгазэ Геннадий Иванович Павлов, Ижкарын улӥсь ожысь ветеран. Аслэсьтыз книгазэ со кузьмаз Светлана Кривилёвалы, Кун Кенешлэн Тӧроезлэн нырысетӥ воштӥсезлы, тазалыкез утёнъя, демографияя но семья политикая ялан ужась комиссилэн кивалтӥсезлы. Депутат укмыстон ньыль аресъем ветеран дорын куное вуылӥз. Воргорон книга гожтон уженыз тодматӥз.
«Али дыре туж трос тодӥськом ожмаськись солдатъёс сярысь, но туж ӧжыт гожтэмын санитаръёс пумысен. Мынам книгае соос сярысь», - шуиз ветеран. Со ачиз ож пыр санитар луыса потэмын, трос солдатъёсты кулонлэсь мозмытэмын.
Геннадий Ивановичлэн мундирез тырмемын орденъёсын но медальёсын. «Анайёс, кудъёссылэсь пиоссэс мон быгатӥ мозмытыны кулонлэсь, ӧз ке басьтэ похоронка – тани та мон понна бадӟымез шуд», - вера ветеран. Светлана Кривилева ӟечкылаз ветеранэз но кузьмаз солы Кун Кенеш сярысь книга но тодмо конструктор Михаил Калашниковлэн суредэныз синпелет.