Кун Кенешлэн Кубокез кылиз Удмуртие

29-тӥ гудырикошконэ Ижкарын Удмурт Элькунысь Кун Кенешлэн кубокез понна валэн ӵошатсконъёс йылпумъяськизы. Вожвылъяськонъёс сӥземын вал Быдӟым Вормонлы 70 ар тырмонлы. Валтӥсез приз, Кун Кенешлэн кубокез, кылиз Удмуртие. Солэн кузёез луиз Полина Рахманова, валэн ворттылонъя удмурт ДЮСШ-лэн дышетскисез. Баррикада валэныз со ваньзылэсь умой ортчиз 120 см ӝуждалаен могӟетъёсты. Кыкетӥ но куинетӥ интыын Пермь шаерысь Анна Омелина Балладир валэныз но Вероника Бусова Земанэныз ӵош.
Огъя зачётын, 120 см ӝуждалаен могӟетъёсын, ваньзылэсь кужмогес луиз Удмуртиысь Алина Хасанова Ильмень валэныз.
Ӵошатсконъёсын вожвылъяськизы нылпиос но егитъёс, кудъёсыз вордскемын 2001-2003 но 1997-2000 аръёсы. Нимысьтыз зачётъёсын ӵошатскизы вань мылкыд карисьёс.
Кун Кенешлэн Тороез Владимир Невоструев та ӵошатсконъёсты одно ик арлы быдэ радъяны кулэ шуыса малпанзэ вераз
«Туннэ ми учким ипподромысь вуж фотографиосты. Трибунаос отын быдэсак калыкен тырмемын. Туннэ ми асьме азе пуктӥсьском таӵе ужпум- шаерысьтымы улӥсьёслы адӟытыны, ипподром улэп шуыса, дась таӵе вожвылъяськонъёсты ортчытыны, дась калыкез дышетыны таӵе чебер ӵошатсконъёсты учкыны», - шуиз Владимир Невоструев.