Кун Кенешысь депутатъёс Ялан ӝуась тыл доры сяськаос понӥзы

Туннэ ӵукна Вормон нуналэз данъяса, Ижын сяськаос понӥзы Ялан ӝуась тыл доры. Ужрадэ пыриськизы Удмуртилэн Тӧроез, "Единая Россия" партилэн шаерысьтымы ёзэзлэн секретарез Александр Бречалов, Кун Кенешлэн Тӧроез Владимир Невоструев, элькун парламентысь депутатъёс, элькун Правительстволэн Тӧроез Ярослав Семёнов но мукет кивалтӥсьёс, пӧртэм ветеран огазеяськонъёслэн ёзчиоссы, кадетъёс, школьникъёс. Соос бӧрсьы сяськаос понӥзы вань мылкыд карисьёс, пичиос но бадӟымъёс.
Ялан ӝуась тыл дорысь солдатлэн пыд улаз уно сяськаос яркыт тылын пиштӥзы. Татчы ик нылпиос асьсэ киын лэсьтэм открыткаос вайылӥзы. Собере калык вамыштӥз Вормон парадэз учкыны.