Элькунлэн Тӧроез депутатъёс азьын нырысетӥ кварталлы йылпумъянъёс лэсьтӥз

Туннэ Кун Кенешлэн сессияз Удмуртилэн Тӧроез Александр Бречалов пыриськиз. 2022-тӥ арлэн нырысетӥ кварталэзлы йылпумъянъёс лэсьтӥз.
«Удмуртия нырысетӥосыз пӧлын соцконтрактъёсын ужаны кутскиз, — вераз элькун Тӧро, — ми бадӟым саклык висъяськомы асьсэ хозяйствооссэз азинтыны, ужбергатонэ вамыш лэсьтыны мылкыд карисьёслы. Таиз ар понна шаерамы 1 сюрс 123 соцконтракт гожтэмын ни».
Мыло-кыдо соцконтрактъёсты гожто Ижкарын, Воткинскын, Можгаын, Сарапулын но Дэри, Пичи Пурга, Ува, Якшур-Бӧдья ёросъёсын.
Александр Бречалов калыкез уже интыян ужпумъёс сярысь но вераз. Шаерамы та вакытлы 0,8 процент ужтэк кылемъёс. Уже интыянъя центръёсын пусъемын 6 сюрс 231 ужтэк кылемъёс. Со дыре ик вакансиос ог 3 поллы тросгес. Ужасьёс уката уг тырмо лэсьтӥськон, вуз карон, транспорт удысъёсын, гурт хозяйствоосын.
«Та вакытэ ог 600 муртэ кутыны дась луэмзы сярысь ивортӥзы Ижысь «Калашников» концерн», механикая заводъёс, 500 муртлы кулэяське Вотка завод, — шуиз Александр Бречалов. — Уж вань! Уждун но та заводъёс пичи уг ӵекто».
Александр Бречалов верамъя, шаерысьтымы 10 пала гурт хозяйствоосын шоро-куспо уждунэз 40 сюрслэсь ятыр ӝутыны быгатӥзы ни. Но ӧжыт ӧвӧл на сыӵе хозяйствоос, кытын уждунзы улыны чаклам минимумозь гинэ мырдэм вуэ. Озьы медаз луы шуыса, та югдурез элькун кивалтӥсьёс нимысьтыз чакласа возёно кариськизы.
Удмуртилэн Тӧроез ужпум пуктӥз: 23 арессэс тырмытэм вань сирота нылпиослэн ас липетсы луыны кулэ ни. Туэ улон инты висъямын ни 15 сирота пиналъёслы. Но черодын 4 сюрс 459 нылпиос на. Пӧлысьтызы ог 750-эзлы 25 арес тырмемын. Югдурысь потон понна пӧртэм амалъёсты кутоно, шуиз элькун Тӧро. 2022-тӥ арын улон инты висъяны федерал но элькун бюджетъёсысь 386 но ӝыны миллион манет висъямын луоз. Со 242 квартиралы тырмоз. 56 миллионэз кошкоз Алнашын сирота нылпиослы 18 квартираем юрт пуктыны.
«Но жаляса верано, 2024-тӥ арозь черодэз быдтыны асьме кужымен гинэ ум ворме, — ватсаз Александр Бречалов. — Соин ик, ватсаса коньдон курыса, Россилэн Президентэзлы но Правительстволы вазиськыны чакламын».